عمران خان قوم کو تقسیم اورنوجوانوں کوگمراہ کررہے ہیں، رانا ثناءاللہ

ان کا کہناتھا کہ گزشتہ چارسالوں کے دوران جو گند پھیلایا گیا اس حوالے سے حکومت کو لیڈرشپ سے جو پالیسی لائن درکار تھی، اس پر تفصیلی بات ہوئی ہے۔

رانا ثناء اللہ کا کہنا تھا کہ میاں نوازشریف نے بطورپارٹی لیڈرجووژن دیا ہے، اس پر دیگراتحادیوں کے ساتھ مل کرعمل درآمد کریں گے۔

وفاقی وزیر داخلہ نے کہا کہ گزشتہ چارسالوں میں ملک اورمعیشت کا بیڑہ غرق کیا گیا، سیاسی روایات کو پامال کیا گیا۔

انہوں نے کہا کہ عمران خان ملک میں بدتمیزی کا کلچرمتعارف کرا رہے ہیں، وہ پوری قوم کو تقسیم اورنوجوانوں کوگمراہ کررہے ہیں، اس طرح کی چیزوں کوروکنے کے لیے قائد نوازشریف کے ساتھ تفصیلی بات ہوئی ہے۔

رانا ثناء اللہ نے کہا کہ میاں نوازشریف نے بطورلیڈرہماری بہترطریقے سے رہنمائی کی، ان کی رہنمائی میں اتحادیوں کے ساتھ مل کر اہم اقدامات کریں گے۔

مسلم لیگ ن کے رہنما کا مزید کہنا تھا کہ قائد نوازشریف کی واضح پالیسی ہے کہ جس جس نے بھی آئین شکنی کی ہے اس کے خلاف ملک کے قانون کے مطابق آئینی تقاضوں کو پورا کیا جائے، آئین شکنی پرزیروٹالرینس ہے، ملک میں افراتفری اورانارکی پھیلانے کی قطعاً اجازت نہیں دی جائے گی۔