صدرمملکت کا پاکستان اورسعودی عرب کےدرمیان وسیع البنیاد شراکت داری پرزور

تفصیلات کے مطابق صدرمملکت  ڈاکٹر عارف علوی نے  پاکستان میں سعودی عرب کے سفیر نواف سعید المالکی سے اسلام آباد میں  ملاقات کی ۔ 

ملاقات میں دوران گفتگو صدرمملکت  نے کہا کہ پاکستان سعودی عرب کے ساتھ اپنے تعلقات کو انتہائی اہمیت دیتا ہے جس نے ہر مشکل وقت میں ہمیشہ پاکستان کی مدد کی ۔

انہوں نے کہا کہ بہت سے علاقائی اور بین الاقوامی معاملات پر دونوں ملکوں کے خیالات میں ہم آہنگی پائی جاتی ہے۔

 انہوں نے دوطرفہ تجارتی تعلقات کو مزید مستحکم بنانے کےلئے کاروباری تعلقات کو مزید بڑھانے اور دونوں ملکوں کی کاروباری شخصیات اور تجارت کے ایوانوں کو باقاعدگی سے روابط رکھنے پرزوردیا۔

 صدر عارف علوی نے کہا کہ سعودی عرب میں مقیم 20 لاکھ سے زائد پاکستانی دونوں ملکوں کی ترقی میں نمایاں کردار ادا کررہے ہیں۔

صدر نے سعودی سفیر سے کہا کہ وہ خادم الحرمین الشریفین کو ان کی طرف سے  نیک خواہشات کا پیغام پہنچائیں اور کہا کہ پاکستان کے عوام ان کی اچھی صحت اور طویل عمر کےلئے دعاگو ہیں۔