ایرانی فائر فائٹر طیارہ شیرانی جنگلات میں لگی آگ بجھانے پاکستان پہنچ گیا

ایران کی جانب سے اپنے برادر ملک  پاکستان کی درخواست پر ضلع شیرانی -ژوب بلوچستان کے جنگلات  میں لگی آگ کو بجھانے کے لیے  بڑا  فائٹر طیارہ آج نور خان ایئر بیس راولپنڈی  پہنچ گیا ۔

ایلوشین-76 (Ilyushin-76) نامی یہ فائر فائٹر طیارہ نہ صرف ایران بلکہ پوری دنیا میں سب سے بڑی فائر فائٹر طیارہ ہیں جو کہ بیک وقت 40 ٹن پانی فضا سے اپنے ہدف پر چھوڑ سکتا ہے ۔ اسی وجہ سے اس جہاز کی کوئٹہ ایئرپورٹ پر اترنے کی گنجائش موجود نہیں تھی۔

ضلع شیرانی کے جنگلوں کی آگ بجھانے کے لئے یہ طیارہ  جنگلوں میں لگی آگ پر مکمل طور پر قابو پانے تک پاکستان میں رہےگا۔

 اس سے قبل اس ایرانی جہاز کو اسکی بہترین کارکردگی کی بنا پر جارجیا، آرمینیا اور ترکی کے جنگلوں میں لگی آگ پر قابو پانے کیلئے استعمال کیا گیا ہے۔

اس حوالے سے سیکرٹری جنگلات بلوچستان دوستین جمالدینی  کا بتانا ہے کہ  ایرانی فائر فائٹر طیارہ شیرانی پہنچ گیا ہے، طیارے کے زریعے آگ بجھانے کا سلسلہ جاری ہے ۔ سیکرٹری جنگلات کاکہنا ہے کہ شیرانی جنگلات میں لگی آگ کی شدت میں بڑی حد تک کمی آئی  ہے ، آگ جزوی طوربجھی ہے ، انگارےہیں جنھیں بجھائےبغیرآگ پرمکمل قابونہیں پایاجاسکتا۔ 

خیال رہے کہ 9 مئی کو مغل کوٹ کے جنگلات سے شروع ہونے والی آگ شیرانی کے جنگلات تک پھیل چکی ہے۔ دو ہفتوں سے لگی آگ سے ہزاروں ایکڑ پر چلغوزے اور زیتون کے درختوں کو بھاری نقصان پہنچ چکا ہے۔

جنگل، جنگلی حیات اور مقامی آبادی کے تحفظ کے لئے فارسٹ رینجز زونز میں دفعہ 144نافذ کرکے فارسٹ رینجز اور زون میں آگ جلا کر پکنک منانے سمیت ہر قسم کی عوامی سرگرمیوں پر پابندی عائد کردی گئی ہے۔

صوبائی محکمہ داخلہ نے پابندی سےمتعلق اعلامیہ جاری کردیا، آگ کی وجہ سے اٹھنے والا دھواں کئی کلومیٹر سے دیکھا جا سکتا ہے۔