پی ٹی آئی رہنما ڈاکٹر یاسمین راشد اور عندلیب عباس کو رہا کر دیا گیا

پاکستان تحریک انصاف کی جانب سے اسلام آباد لانگ مارچ کا قافلے مختلف رہنماؤں کی قیادت میں رواں دواں ہیں اور ان ہی میں سے ایک قافلے کی قیادت یاسمین راشد کر رہی تھیں۔ 

اس سے قبل بھی ڈاکٹر یاسمین راشد کی گاڑی پر پولیس کی جانب سے لاٹھی چارج کی تصاویر اور ویڈیو منظر عام پر آئی تھیں اور اس دوران پولیس کے لاٹھی چارج کے باعث ڈاکٹر یاسمین راشد کی گاڑی کی ونڈ اسکرین ٹوٹ گئی تھی۔

اب اطلاعات ہیں کہ پولیس نے ڈاکٹر یاسمین راشد اور عندلیب عباس کو حراست میں لے لیا ہے۔

تاہم سی سی پی او لاہور کا کہنا ہے کہ ڈاکٹر یاسمین راشد اور عندلیب عباس کو گرفتار نہیں کیا گیا، دونوں خواتین خود پولیس کی گاڑی میں بیٹھی ہیں۔

اس کے علاوہ پولیس نے راوی پل کے قریب پی ٹی آئی رہنما حماد اظہر کو بھی گرفتار کرنے کی کوشش کی تھی تاہم تحریک انصاف کے کارکنوں کی جانب سے شدید مزاحمت کی گئی اور پولیس کو حماد اظہر کو گرفتار کرنے نہیں دیا گیا۔

دوسری جانب جمشید اقبال چیمہ اور مسرت چیمہ کو پولیس نے حراست میں لے لیا گیا ہےجس کے بعد  جمشید چیمہ کو بادامی باغ پولیس اسٹیشن منتقل کردیا گیا ہے۔ 

جمشید اقبال چیمہ کی اہلیہ مسرت چیمہ کا کہنا تھا کہ بس میں موجود تمام افراد اور خواتین وکلا سب کو حراست میں لے لیا گیا ہے۔ 

واضح رہے کہ پی ٹی آئی کے لانگ مارچ سے ایک رات قبل لاہور پولیس نے پی ٹی آئی پنجاب کے صدر شفقت محمود کے گھر پر چھاپہ مارا، جبکہ میاں محمود الرشید کو  بھی حراست میں لے لیا گیا۔

پولیس ذرائع کے مطابق میاں محمود الرشید کو 16 ایم پی او کے تحت گرفتار کیا گیا ہے۔

خیال رہے کہ پاکستان تحریک انصاف (پی ٹی آئی) نے موجودہ حکومت کے خلاف 25 مئی کو لانگ مارچ کا اعلان کیا ہوا ہے جس کے بعد وفاقی حکومت نے لانگ مارچ کی اجازت نہ دینے کا فیصلہ کیا اور ملک کے مختلف حصوں میں راستے بند کر دیے گئے ہیں جبکہ  پی ٹی آئی رہنماؤں اور  کارکنوں کی گرفتاریوں کے لیے چھاپے مارے جا رہے ہیں۔