تحریک انصاف کے کارکنان ریڈ زون میں داخل 

عمران خان کا پشاور سے آنیوالا قافلہ اسلام آباد میں داخل ہوگیا، کارکنان کی بڑی تعداد اسلام آباد پہنچ چکی ہے ۔ پی ٹی آئی کارکنان نے ڈی چوک پر آخری رکاوٹ بھی عبور کرلی ۔ پی ٹی آئی کارکنان ایوان صدر کے سامنے بھی پہنچ گئے ہیں جبکہ عمران خان جناح ایونیو سے بنی گالہ کیلئے روانہ ہوگئے ہیں۔

ترجمان اسلام آباد پولیس کے مطابق  پولیس، رینجرز اور دیگر قانون نافذ کرنے والے اداروں نے انہیں بڑے تحمل سے روکا، آئی جی اسلام آباد ڈاکٹر اکبر ناصر خان بھی خود موقع پر موجود ہیں تمام مظاہرین کو ریڈ زون سے باہر جانے کی ہدایت کی جارہی ہے۔

عمران خان کے ساتھ قافلے کی صورت میں آنے والے کارکنان منتشر ہونا شروع ہوگئے ہیں۔

چیئرمین تحریک انصاف عمران خان کی قیادت میں گزشتہ روز پشاور سے شروع ہونے والا آزادی مارچ کا قافلہ کئی گھنٹوں کا سفر طے کرنے کے بعد صبح سویرے جناح ایونیو اسلام آباد پہنچا جہاں عمران خان نے خطاب بھی کیا۔

چیئرمین تحریک انصاف عمران خان نے حکومت کو 6 روز کا الٹی میٹم دیتے ہوئے کہا تھا کہ اسمبلیاں تحلیل کی جائیں اور جون میں نئے الیکشن کا اعلان کیا جائے ورنہ پوری قوم کے ساتھ دوبارہ اسلام آباد آؤں گا اور اس بار کوئی رکاوٹ نہیں ہو گی۔

خیال رہے کہ عمران خان کا قافلہ رات 11 بجے اسلام آباد میں داخل ہوا تھا۔ اس سے پہلے عمران خان نے کارکنوں کو ڈی چوک پہنچنے کی ہدایت کی تھی۔