امریکا : ہسپتال میں فائرنگ سے 4 افراد ہلاک ، متعددزخمی 

امریکی میڈیا کے مطابق سینٹ فرانسس  ہسپتال میں ہونیوالے حملے میں متعدد افراد زخمی بھی ہوئے ہیں جبکہ فائرنگ کے بعد حملہ آور نے خودکشی کرلی ۔ 

امریکی پولیس کا کہنا ہے کہ زخمیوں کو اسپتال منتقل کردیا گیا ہے جہاں ان کی طبیعت بہتر بتائی جارہی ہے۔

تلسا کے ڈپٹی پولیس چیف ایرک ڈالگلیش نے میڈیا  کو بتایا کہ فائرنگ سے متعلق فون کال موصول ہونے کے تین منٹ بعد ہی پولیس سینٹ فرانسس ہسپتال پہنچ گئی تھی۔

پولیس کے مطابق ملزم نے اسپتال میں داخل ہوتے ہی رائفل اور پستول سے فائرنگ کی، حملہ آور کی تاحال شناخت نہیں ہوسکی ، ملزم کے  بارے میں تفتیش کی جارہی ہے ۔

امریکی صدر جو بائیڈن کو بھی اس حوالے سے حکام کی جانب سے بریفنگ دی گئی ہے ۔ 

یاد رہے کہ گزشتہ ہفتے امریکی ریاست ٹیکساس  کے ایک اسکول میں بھی فائرنگ کا واقعہ پیش آیا تھا جس میں 19بچوں سمیت 22 افراد ہلاک ہوئے تھے ۔