وزیراعظم ایوان میں آکر مہنگائی پر جواب دیں: خورشید شاہ

سینیٹ اجلاس میں خطاب کرتے ہوئے پاکستان پیپلز پارٹی کے مرکزی رہنما خورشید شاہ نے کہا ہے کہ وزیراعظم ایوان میں آ کر مہنگائی پر جواب دیں، حقائق جو بھی ہیں اس ایوان میں آکر بتایا جانا چاہیے،بلاول بھٹو نے ملک کی خاطر کہا کہ روس کا دورہ غلط نہیں تھا۔

یوسف رضا گیلانی نے سینیٹ اجلاس میں بھارت کی حکمران پارٹی کے ترجمانوں کے توہین آمیز بیانات پر کہا کہ بی جے پی نے یہ حرکت کشمیر کے ایشو سے توجہ ہٹانے کے لیے کی ہے، اس اقدام کی جتنی بھی مذمت کی جائے وہ کم ہے۔

سینیٹر فیصل جاوید نے اظہار خیال کرتے ہوئے کہا کہ عمران خان نے اقوام متحدہ میں ناموس رسالت کا بھرپور مقدمہ لڑا اور ان کے اس اقدام کے بعد اسلاموفوبیا کے خلاف عالمی دن مقرر کیا گیا،کاش آج عمران خان پاکستان کے وزیراعظم ہوتے تو سب کو پتا چل جاتا۔

چیئرمین سینیٹ صادق سنجرانی نے کہا ہے کہ ناموس رسالت پر ایوان سے متفقہ طور پر مذمتی قرارداد منظور کروائی جائے گی اور میرے دستخط کے ساتھ قرارداد کی کاپی اقوام متحدہ کے دفتر جمع کروائی جائے گی، ایوان بالا کا 3 رکنی وفد اقوام متحدہ کے دفتر جا کر اپنا احتجاج ریکارڈ کروائے گا۔