حکومت کا ملک بھر میں بازار رات 8 بجے بند کر نے کا فیصلہ

تفصیلات کے مطابق وزیراعظم شہبازشریف کی صدارت قومی اقتصادی کونسل کا اہم اجلاس ہوا ہے جس میں سندھ کے وزیراعلیٰ سید مراد علی شاہ، پنجاب کے وزیراعلیٰ حمزہ شہباز اور بلوچستان کے وزیراعلیٰ عبدالقدوس بزنجو نے شرکت کی جبکہ خیبرپختونخوا کی نمائندگی چیف سیکریٹری ڈاکٹر شہزاد خان بنگش نے کی، اجلاس میں توانائی کے بحران سے نمٹنے کے لیے اہم مشاورت کی گئی۔

وزیر اعظم شہباز شریف نے کہا کے قومی اقتصادی کونسل کا فورم قومی وحدت کا مظہر ہے اور اسکا بنیادی مقصد مربوط کوششوں سے وفاق کو مضبوط بنانے کے لیے قومی ہم آہنگی بڑھانا ہے، قومی اقتصادی کونسل کو عدم مساوات کو مدنظر رکھنا چاہیے اور یہ وفاق اور صوبوں کی اجتماعی ذمہ داری ہے کہ متوازن علاقائی ترقی کے لیے اپنا کردار ادا کریں۔

اجلاس میں توانائی کی بچت کے حوالے سے کیے گئے فیصلوں کے تحت چاروں صوبوں میں بازار اور دکانیں رات 8 بجے بند کرنے کی تجویز پر اتفاق کیا گیا، تاہم عملدرآمد کے لیے تینوں صوبوں کے وزرا اعلیٰ نے دو دن کا وقت مانگا ہے تاکہ صوبوں میں تجارتی و کارباری تنظیموں سے مشاورت کر لی جائے۔

دوسری جانب آل پاکستان انجمن تاجران نے حکومت کی شام 8 بجے دوکانیں بند کرنے کی تجویز کو مسترد کر دیا ہے، اس حوالے سے صدر آل پاکستان انجمن تاجران اجمل بلوچ نے کہا ہے کہ حکومت تاجر برادری کے لیے آسانیاں پیدا کرے نہ کہ مشکلات، تاجر شام 6 بجے سے رات 10 بجے تک سب سے مہنگی بجلی خریدتا ہے،حکمران اپنے اے سی بند کریں گے تو غریب کا پنکھا چلے گا۔