کیا ڈی جی آئی ایس پی آر فیصلہ کریں گے کہ سازش تھی یا نہیں:عمران خان

چیئرمین پاکستان تحریک انصاف عمران خان نے سوشل میڈیا پر سوال جواب کے ایک سیشن میں حکومت پر تنقید کرتے ہوئے کہا کہ یہ قانون لے کر آئے ہیں کہ اب نیب شہباز شریف کے انڈر آجائے گا اس طرح اپنے سارے کیسز معاف کروا لیں گے۔

انہوں نے کہا کہ ہم نے فیصلہ کیا ہے کہ ہم مسلسل ان کے خلاف جدوجہد کریں گے، یہ سیاست نہیں جہاد ہے، کرپٹ ترین لوگ جن کے اوپر اربوں روپے کے کیسز ہیں وہ حکمران بن بیٹھے ہیں، یہ ملک کی توہین ہے، انہوں نے آتے ہی اپنے کیسز ختم کرنا شروع کر دیے۔

سابق وزیر اعظم نے کہا کہ ہمیں تو معلوم ہے کہ سازش ہوئی اس لئے تحقیقات چاہتے ہیں، سازشی مراسلے پر حقائق سے کوئی انکار نہیں کرسکتا،جب مراسلہ میرے پاس آیا تو پتا چلا کہ عمران خان کو ہٹانا ہے، 7 مارچ کو ڈونلڈ لو نے آفیشل میٹنگ میں بات کی، ڈونلڈ لو نے دھمکی دی عمران خان کو نہ ہٹایا تو اس کا انجام اچھا نہیں ہوگا، کیا ڈی جی آئی ایس پی آر فیصلہ کریں گے کہ سازش ہوئی تھی یا نہیں، سازش ہوئی یا نہیں اس کا فیصلہ ملک کا وزیراعظم اور چیف جسٹس کریں گے۔

انہوں نے کہا کہ ایف آئی اے کے افسر ڈاکٹر رضوان بھی ہارٹ اٹیک سے انتقال کر گئے، ایک اور افسر کے بارے میں پتا چلا اس نے خودکشی کر لی ہے، ان کا مقصد صرف اپنے کرپشن کیسز ختم کرنا تھا، ان کے سارے پیسے باہر پڑے ہوئے ہیں، انہوں نے 2 ماہ میں وہ مہنگائی کی جو ہم نے 3 سال میں نہیں کی۔