اوآئی سی اجلاس: وزیر خارجہ اسحاق ڈار کی صومالی لینڈ کوریاست تسلیم کرنے کے اسرائیلی اقدام کی مذمت

جدہ: نائب وزیراعظم اور وزیر خارجہ محمد اسحاق ڈار نے کہا ہے کہ پاکستان صومالیہ کی خودمختاری، وحدت اور علاقائی سالمیت کی مکمل حمایت کرتا ہے اور صومالی لینڈ کو تسلیم کرنے سے متعلق اسرائیلی اقدام کی شدید مذمت کرتا ہے۔ 

تفصیلات کےمطابق جدہ میں او آئی سی وزرائے خارجہ کونسل کے غیر معمولی اجلاس سے خطاب کرتے ہوئے اسحاق ڈار نے کہا کہ اسرائیل کی جانب سے صومالی لینڈ کو تسلیم کرنا اور اسرائیلی وزیر خارجہ کا دورہ غیر قانونی اور غیر حقیقی اقدام ہے جس کا کوئی قانونی یا سیاسی اثر نہیں ہوگا۔

اپنے خطاب میںنائب وزیراعظم نے کہا کہ اسرائیل نے صومالی لینڈ کو تسلیم کر کے اور وہاں اپنے وزیر خارجہ کو بھیج کر صومالیہ کی بین الاقوامی طور پر تسلیم شدہ سرحدوں پر براہ راست حملہ کیا ہے۔

ان کا کہنا تھا کہ صومالی لینڈ صومالیہ کا غیر متنازع اور اٹوٹ حصہ ہے اور بین الاقوامی قانون کے تحت ریاستوں کی خودمختاری اور علاقائی سالمیت کا احترام لازم ہے۔ کوئی بیرونی ریاست یا ادارہ اس حقیقت کو بدلنے کا نہ قانونی اور نہ ہی اخلاقی حق رکھتا ہے۔

اسحاق ڈار نے اسرائیلی وزیر خارجہ کے صومالی لینڈ کے دورے کو انتہائی تشویشناک قرار دیتے ہوئے کہا کہ ایسے اقدامات نہ صرف اقوام متحدہ کے منشور اور بین الاقوامی قانون کی خلاف ورزی ہیں بلکہ ہارن آف افریقہ اور بحیرہ احمر میں امن و سلامتی کے لیے بھی سنگین خطرہ ہیں۔

انہوں نےمزید کہا کہ پاکستان نے اقوام متحدہ کی سلامتی کونسل میں بھی اس مسئلے پر صومالیہ کی بھرپور حمایت کا اظہار کیا اور اسرائیلی کارروائی کی واضح مذمت کی، صومالیہ میں عوامی ووٹ کی بنیاد پر انتخابات ترقی اور استحکام کی علامت ہیں اور پاکستان صومالی عوام اور سیکیورٹی فورسز کی قربانیوں کو قدر کی نگاہ سے دیکھتا ہے۔

انہوں نے خبردار کیا کہ اسرائیلی اقدام دہشت گردی کے خلاف عالمی اور علاقائی کوششوں کو نقصان پہنچا سکتا ہے۔

اسحاق ڈار نے خطاب میں کہا کہ ریاستی اداروں کی مضبوطی اور اقتصادی شعبے میں شفاف اصلاحات خطے کے استحکام کے لیے اہم ہیں۔

انہوں نے غزہ میں جنگ کے خاتمے اور انسانی امداد کی فوری فراہمی کی ضرورت پر زور دیتے ہوئے کہا کہ پاکستان او آئی سی اور عرب ممالک کے ساتھ مل کر فلسطینی عوام کے حقِ خودارادیت کی حمایت جاری رکھے گا، اور پاکستان فلسطینی عوام کے ساتھ کھڑا ہے۔