وزیر خارجہ اسحاق ڈار کا دورہ سعودی عرب، مدینہ منورہ سے جدہ پہنچ گئے

جدہ: نائب وزیرِ اعظم اور وزیرِ خارجہ اسحاق ڈار مدینہ منورہ سے جدہ پہنچ گئے۔

ترجمان دفتر خارجہ کے مطابق سعودی عرب میں پاکستان کے سفیر احمد فاروق نے نائب وزیراعظم کا استقبال کیا، سعودی رائل پروٹوکول اور جدہ میں پاکستان کے ڈپٹی قونصل جنرل بھی موجود تھے۔

 اسحاق ڈار جدہ میں او آئی سی کے غیر معمولی کونسل آف فارن منسٹرز اجلاس میں شرکت کریں گے۔

 ترجمان دفتر خارجہ نے بتایا کہ اسحاق ڈار جدہ میں پاکستان قونصل خانے کی نئی چانسلری عمارت کا افتتاح بھی کریں گے۔

اس سے قبل وزیر خارجہ اسحاق ڈار نے مدینہ منورہ میں روضۂ رسول ﷺ پر حاضری دی۔

نائب وزیراعظم نے روضۂ رسول ﷺ پر حاضری کے موقع پر نوافل ادا کیے اور پاکستان کے امن، استحکام، ترقی ، خوشحالی ،امتِ مسلمہ کی یکجہتی، سلامتی اور فلاح و بہبود کے لیے خصوصی دعا کی۔