وزیراعظم شہباز شریف کا ریکارڈ ترسیلاتِ زر بھیجنے پر سمندر پار پاکستانیوں سے اظہارِ تشکر

اسلام آباد: وزیراعظم محمد شہباز شریف نے دسمبر 2025 کے دوران گزشتہ برس کے مقابلے میں ریکارڈ ترسیلاتِ زر بھیجنے پر سمندر پار مقیم پاکستانیوں سے اظہارِ تشکر کیا ہے۔

وزیر اعظم ہاؤس کی جانب سے جاری بیان کے مطابقوزیراعظم نے کہا کہ دسمبر 2025 میں محبِ وطن سمندر پار پاکستانیوں کی جانب سے 3.6 ارب ڈالر کی ترسیلاتِ زر بھیجی گئیں، جس پر وہ اور پوری قوم ان کے مشکور ہیں۔

انہوں نے کہا کہ ترسیلاتِ زر میں گزشتہ برس کے مقابلے میں 16.5 فیصد اضافہ سمندر پار پاکستانیوں کے حکومت کی پالیسیوں پر اعتماد کا واضح مظہر ہے۔

وزیراعظم کے مطابق بیرونِ ملک مقیم پاکستانیوں نے منفی پراپیگنڈے کو مسترد کرتے ہوئے وطن کی تعمیر و ترقی کے لیے ترسیلاتِ زر بھیجیں، جو ان کی اپنے ملک سے محبت کی اعلیٰ مثال ہے۔

وزیراعظم محمد شہباز شریف نے کہا کہ سمندر پار مقیم پاکستانی ہمارا قیمتی سرمایہ ہیں اور مجھ سمیت پوری قوم کو ان پر فخر ہے۔ انہوں نے مزید کہا کہ سمندر پار پاکستانیوں کی فلاح و بہبود کے لیے اقدامات حکومت کی اولین ترجیحات میں شامل ہیں۔