وزیر اعظم کا ایرانی صدر ابراہیم رئیسی سے ٹیلی فونک رابطہ

میڈیا ذرائع کے مطابق وزیراعظم شہباز شریف نے نے پاکستان اور ایران کے درمیان جغرافیائی قربت، مشترکہ تاریخ اور باہمی افہام و تفہیم پر مبنی تاریخی تعلقات کی اہمیت کو اجاگر کرتے ہوئے تجارت، توانائی، بجلی اور عوامی روابط سمیت باہمی تعاون کے تمام شعبوں میں دوطرفہ تعلقات کو فروغ دینے کے لیے اپنی حکومت کے مضبوط عزم کا اعادہ کیا۔

وزیر اعظم شہباز شریف نے کہا کہ مشترکہ اقتصادی کمیشن کا اجلاس جلد بلانے سے دونوں ممالک کے درمیان اقتصادی روابط مزید مضبوط ہوں گے، انہوں نے یہ امید بھی ظاہر کی کہ روزگار کو آسان بنانے کے لیے سرحدی علاقے میں بارڈر اسٹیننس مارکیٹس جلد فعال ہوجائیں گی۔

ایرانی صدر سید ابراہیم رئیسی نے عید کی مبارک باد پر وزیراعظم پاکستان کا شکریہ ادا کیا اور دوطرفہ تجارت کو مزید وسعت دینے خاص طور پر مکران ڈویژن کو بجلی کی فراہمی میں ایرانی تعاون کی یقین دہانی کرائی۔

میڈیا رپورٹس میں بتایا گیا ہے کہ وزیراعظم شہباز شریف نے ایرانی صدر کو پاکستان کے دورہ کی دعوت دی ہے جبکہ ایرانی صدر کی جانب سے بھی وزیراعظم شہباز شریف کو جلد دورہ ایران کی دعوت دی گئی ہے۔