دینی مدارس اور فلاحی ادارے کھالوں کی قیمتوں میں اضافے پر خوش

گزشتہ سال گائے اور بیل کی کھال 550روپے تک آگئی تھی جب کہ بکروں اور دنبوں کی کھال 50اور 100روپے میں بک رہی تھی یہ قیمت اتنی کم تھی کہ کھالیں اکھٹی کرنے اور فروخت کے لئے لے جانے کے اخراجات بھی بمشکل سے پورے ہورہے تھے جس کی وجہ سے دینی مدارس اور فلاحی اداروں کی جانب سے کھالیں اکھٹی نہیں کی جارہی تھی اکثر لوگ خود ہی مساجد،مدارس اور فلاحی اداروں میں خود ہی جمع کروارہے تھے لیکن اس سال صورتحال یہ نہیں ہے۔

ایک بڑے دینی مدرسے کی انتظامیہ کے مطابق انہیں 2500روپے کے نرخ ملے ہیں، ایک او ر بڑے دینی مدرسے کے بارے میں معلوم ہوا ہے کہ انہیں 3ہزار روپے کے بھی آفر ملے ہیں جب کہ ایک بڑے فلاحی ادارے کے زمہ دار کے مطابق انہیں گائے اور بیل کی کھال کی قیمت2ہزار روپے بتائی گئی ہے۔

سابق چیئرمین پاکستان ٹینریز ایسوسی ایشن ساوتھ عبدالسلام نے بھی رواں سال کھالوں کی قیمتیں زیادہ ہونے کی تصدیق کی ہے سماء ڈیجیٹل سے گفتگو کرتے ہوئے انہوں نے بتایا کہ گائے اور بیل کی کھال 1500روپے کے لگ بھگ ہونے اور بکرے کی ساڑھے تین سو روپے ہونے کی توقع ہے۔کھالوں کی قیمتیں بڑھنے کی وجہ عالمی مارکیٹ میں لیدر مصنوعات کی ڈیمانڈ میں اضافہ بتایا جارہا ہے عبدالسلام کے مطابق کرونا وائرس کی وجہ سے چین سے لیدر مصنوعات کی سپلائی میں کمی آئی ہے جس کی وجہ سے پاکستان آرڈر منتقل ہورہے ہیں جس کی وجہ سے توقع ہے کہ رواں سال لیدر مصنوعات میں بھی20فیصد تک اضافہ ہوجائے گا۔

وفاقی ادارہ شماریات کے مطابق رواں مالی سال کے11ماہ یعنی جولائی 2021تامئی2022لیدر مصنوعات کی برآمدات میں اس سے پچھلے مالی سال کے مقابلے میں ڈالر کے حساب سے12.64فیصد اور پاکستانی روپے میں 22.51فیصد اضافہ ہوا ہے۔

واضح رہے کہ 2012میں بڑے جانور کی کھال 5ہزار روپے کی بلند سطح پر پہنچ گئی تھی جس کے بعد قیمت میں کمی آنی شروع ہوئی اور گزشتہ سال یہ قیمت550روپے تک آگئی تھی بعض زرائع کا یہ بھی کہنا ہے کہ لمپی اسکن سے جانور متاثر ہونے کی وجہ سے کم کھالیں ملنے کے پیش نظر بھی قیمتوں میں اضافہ دیکھا جارہا ہے۔

دینی مدارس اور فلاحی اداروں کے زرائع کے مطابق کھالوں کے نرخ بڑھنے پر منتظمین میں اطمینان پایا جارہا ہے اور امید ہے کہ رواں سال کھالیں جمع کرنے میں گرمجوشی نظر آئے گی۔