عوام کے تحفظ اور مدد کے لئے تمام وسائل بروئے کار لائیں گے، وزیر اعظم

وزیر اعظم آفس کی جانب سے جاری بیان کے مطابق وزیر اعظم نے کہا کہ انہیں کراچی سمیت ملک کے دیگر حصوں میں اموات پر بہت دکھ ہے، اس موقع پر وہ متاثرین سے ہمدردی کا اظہار کرتے ہیں۔ عوام کے تحفظ اور مدد کے لئے ان شاءاللہ تمام وسائل بروئے کار لائیں گے۔

بارش متاثرین سے یک جہتی کا اظہار کرتے ہوئے وزیر اعظم نے ملک بھر میں موسلا دھار بارشوں سے عوام کے تحفظ کو یقینی بنانے کے لئے صوبائی حکومتوں اور این ڈی ایم اے کو ہدایات جاری کردیں۔

وزیر اعظم نے کہا کہ کراچی سمیت ملک کے دیگر حصوں میں ہونے والی اموات پر بہت دکھ ہے اور وہ متاثرین سے ہمدردی کرتے ہیں، این ڈی ایم اے کراچی اور سندھ میں عوام کے تحفظ، ریسکیو اور ریلیف میں صوبائی حکومت اور اداروں کی معاونت کرے۔

وزیراعظم نے کہا کہ عوام کے تحفظ اور نقصانات سے حتی الامکان بچاؤ کے لئے بھرپور کوششیں کی جائیں، نیشنل ڈیزاسٹر مینجمنٹ اتھارٹی صوبائی حکومتوں اور پی ڈی ایم ایز کے ساتھ اشتراک عمل کریں۔

وزیراعظم نے ہدایت کی وفاق کی جانب سے صوبائی حکومتوں اور اداروں کی بھرپور مدد کی جائے، خطرے کی زد میں آنے والے علاقوں کے عوام کو محفوظ مقامات پر منتقل کیا جائے۔

متاثرہ عوام کو عارضی پناہ گاہوں اور خوراک کی فراہمی یقینی بنانے کی ہدایت کرتے ہوئے وزیراعظم نے کہا کہ ہنگامی طبی امداد اور وبائی امراض سے بچاؤ کے لئے میڈیکل ٹیموں کو متحرک کیا جائے، بارشی وسیلابی پانی کے نکاس کے لئے مطلوبہ مشینری اور عملہ متعلقہ مقامات پر پہنچایا جائے اور اسپرے کروایا جائے تاکہ وباؤں کو روکا جاسکے۔