عوام  ووٹ کی طاقت سے انتشار، نفرت اور تقسیم کی سیاست مسترد کریں : وزیر اعظم 

تفصیلات کے مطابق  وزیر اعظم شہبازشریف  نے  سماجی رابطے کی ویب سائٹ ٹوئٹر پر پیغام میں کہا کہ ایک شخص کی انا،اندازِ سیاست اور نااہلی نےہمارے معاشرےکے حسن کو تہ و بالا کرکے رکھ دیا ہے ، عوام اپنا ووٹ قومی ترقی اور اپنے بچوں کے روشن مستقبل کیلئےڈالیں،مجھے آپ کی قوتِ انتخاب پر پورا بھروسہ ہے۔

وزیراعظم نے کہا کہ ‏پنجاب کو پونے4 سال بدترین گورننس کا نشانہ بنایا گیا، شہریوں کو مفت ادویات اور طلبہ کو وظائف سےمحروم کیا گیا۔

انہوں نے کہا کہ سرکاری آسامیوں اورتبادلوں کی کھلےعام خرید و فروخت کی گئی، شہری سہولیات کی حالت ابتر اور لاقانونیت عروج پررہی۔انہوں نے کہا کہ گزشتہ دور میں پنجاب کی جو حالت کی گئی وہ لوگوں کی توہین سےکم نہیں۔

واضح رہے کہ پنجاب کے 14اضلاع کے 20 حلقوں میں ضمنی انتخابات کیلئے پولنگ کا عمل جاری ہے ۔