پنجاب کے ضمنی انتخابات کے دوران تمام حلقوں میں سیکیورٹی ہائی الرٹ ہے : وزیرداخلہ 

تفصیلات کے مطابق وفاقی وزیر داخلہ رانا ثناءاللہ   نے  ایک بیان میں کہا کہ  عوام بلا خوف انتخابات میں اپنا حق رائے دہی استعمال کریں، الیکشن کمیشن کی درخواست پرسول آرمڈ فورسز کو تمام انتخابی حلقوں میں تعینات کیا گیا ہے جبکہ انتہائی حساس حلقوں میں سکیورٹی فورسز کی اضافی نفری تعینات کی گئی ہے۔

ان کا کہنا تھا کہ رینجرز اورفرنٹیئر کانسٹیبلری کے علاوہ پاک فوج بھی انتخانی حلقوں میں بطورکوئیک ریسپانس فورس فرائض سرانجام دے رہی ہے۔

وزیر داخلہ  نے کہا کہ وزارت داخلہ میں مانیٹرنگ سیل قائم کردیا گیا ہے جو انتخابی حلقوں میں سکیورٹی صورت حال کی مسلسل نگرانی کررہاہے ، مانیٹرنگ سیل پنجاب اور سندھ کی صوبائی حکومتوں اور سول آرمڈ فورسز کے ہیڈکوارٹر کےساتھ منسلک ہے۔

انہوں  نے کہا کہ قانون نافذ کرنے والے تمام ادارے پوری طرح چوکس ہیں، کسی بھی ایمرجنسی کی صورت میں بلا تاخیر ریسپانس کریں گے۔

رانا ثنا اللہ نے کہا کہ ضمنی انتخابات کے تمام حلقوں میں آتشیں اسلحے کی نمائش اور ساتھ رکھنے پرمکمل پابندی ہے،آتشیں اسلحہ پابندی احکامات کی خلاف ورزی پرفوری گرفتاری ،اسلحہ ضبطگی اورلائسنس منسوخ کرنے کےاحکامات ہیں۔

انہوں نے مزید کہا کہ  سکیورٹی فورسز شرپسند عناصر پر بھی کڑی نظر رکھے ہوئے ہیں، ایسے افراد کے خلاف زیرو ٹالرنس پالیسی ہے۔

رانا ثناء اللہ نے عوام سے اپیل کی کہ وہ بلا خوف انتخابات میں اپنا حق رائے دہی استعمال کریں،کسی بھی شکایت کی صورت میں قانون نافذ کرنے والے اداروں سے رابطہ کریں،فوری عملدرآمد ہوگا۔ 

واضح رہے کہ پنجاب کے 14اضلاع کے 20 حلقوں میں ضمنی انتخابات کیلئے پولنگ کا عمل جاری ہے ۔