یورپ میں گرمی کی شدت میں اضافہ ، تباہی مچ گئی 

غیرملکی میڈیا کے مطابق ایک ہفتے سے جاری گرمی کی لہر کے سبب فرانس، اسپین اور پرتگال میں ہزاروں افراد محفوظ مقامات پر منتقل ہوگئے ہیں۔   گرمی کی یہ لہر7جولائی سے شروع ہوئی تھی  اس دوران 7 سے13 جولائی کے دوران مجموعی طور پر 238 پرتگالی ہلاک ہو گئے۔

رپورٹ کے مطابق برطانیہ کی تاریخ میں پہلی بار درجہ حرارت 40 ڈگری سینٹی گریڈ سے اوپر چلا گیا، اس ریکارڈ گرمی سے 13 اموات ریکارڈ کی گئی ہیں ، خود کو گرمی کی شدت سے بچانے کے لیے جھیلوں اور دریاؤں کا رخ کرنے والوں میں سے 5 افراد کے ڈوبنے کی خبر رپورٹ ہوئی ہیں۔

سخت گرمی کی وجہ سے درجنوں مقامات پر آگ بھڑک اٹھی ،  30 ڈگری سینٹی گریڈ تک کام کرنیوالی ٹرینیں بھی متاثر ہوئی  ہیں۔ درجہ حرارت بڑھنے سے مواصلات کا نظام بھی  بری طرح متاثر ہوا ہے ۔ آج سے موسم بہتر ہونے کا امکان اور بارش کی پیش گوئی کی گئی ہے۔

دوسری جانب اقوام متحدہ نے خبردار کیا ہے کہ دنیا بھر میں ہیٹ ویو کا تسلسل 2060 تک بڑھتا جائے گا۔ 

اقوام متحدہ کی عالمی موسمیاتی ایجنسی کا کہنا ہے کہ ہیٹ ویو زیادہ کاربن اخراج کرنے والے ممالک کے لیے  انتباہ ہے۔ عالمی موسمیاتی ایجنسی کے مطابق کاربن اخراج میں اضافہ نہ روکا گیا تو موسمیاتی شدت مزید بڑھے گی۔

رپورٹس کے مطابق سب سے زیادہ کاربن اخراج کرنے والے ایشیائی ممالک موسمیاتی شدت کا زیادہ نشانہ بنیں گے۔