سپریم کورٹ میں  تمام سیاسی جماعتوں کے قائدین کے داخلے پر پابندی عائد

ذرائع  کے مطابق  انتظامیہ نے سپریم کورٹ میں سیاسی جماعتوں کے قائدین کے داخلے پر پابندی عائد کردی ، صرف کیس سے متعلقہ وکلاء اور فریقین کو سپریم کورٹ میں داخلے کی اجازت ہوگی ۔ 

 ذرائع کاکہنا ہے کہ چوہدری شجاعت حسین،مولانا فضل الرحمٰن، بلاول بھٹو سمیت دیگر نے سپریم کورٹ آنے کا اعلان کر رکھا ہے۔  حکومتی اتحادیوں اور پی ڈی ایم میں شامل جماعتوں نے وزیراعلیٰ پنجاب کے انتخاب کے معاملے میں فل کورٹ بینچ کے لیے سپریم کورٹ سے رجوع کرنے کا فیصلہ کیا ہے۔

سپریم کورٹ میں آج بڑے سیاسی رہنما سماعت پر موجود ہوں گے  ، سماعت کے پیش نظر سکیورٹی کے خاطر خواہ انتظامات کئے گئے ہیں، سپریم کورٹ کے اندر اور باہر سیکورٹی کے سخت انتظامات کیے گئے ہیں جبکہ پولیس کی بھاری نفری بھی عدالت کے باہر تعینات کردی گئی ہے ۔ 

 ریڈ زون میں اراکان اسمبلی اور میڈیا کی گاڑیوں کو داخلے کی اجازت ہوگی، گاڑیوں کے داخلے کے لیے ایکسپریس چوک بھی بند کر دیا گیا ہے۔

انتظامیہ کی جانب سے اسلام آباد ریڈ زون میں کسی قسم کے احتجاج کی اجازت نہیں دی گئی ہے، ڈپلومیٹک انکلیو جانے والوں کو سیکیورٹی ڈویژن سے تصدیق کے بعد داخلے کی اجازت ہوگی جبکہ سیکیورٹی چیکنگ کی وجہ سے داخلے میں تاخیر ہوسکتی ہے۔