اسپیکر قومی اسمبلی نے تحریک انصاف کے 11 اراکین اسمبلی کے استعفے منظور کر لیے

تفصیلات کے مطابق اسپیکر قومی اسمبلی راجہ پرویز اشرف نے پاکستان تحریک انصاف کی رکن قومی اسمبلی ڈاکٹر شیریں مزاری، محمد علی خان اور فرخ حبیب سمیت 11 ارکان قومی اسمبلی کے استعفے منظور کر لیے ہیں۔

اسپیکر کی جانب سے ممبران قومی اسمبلی کو ڈی نوٹیفائی کرکے مراسلہ الیکشن کمیشن بھیج دیا گیا، استعفوں کی منظوری سے پہلے سپیکر قومی اسمبلی نے وفاقی وزراء خورشید شاہ، سعد رفیق، ایاز صادق سے مشاورت کی۔

ذرائع قومی اسمبلی کے مطابق اسپیکر قومی اسمبلی نے استعفے آئین پاکستان کی آرٹیکل 64 کی شق (1) کے تحت تفویص اختیارات کو بروئے کار لاتے ہوئے منظور کیے۔

اسپیکر کی جانب سے تحریک انصاف کے علی محمد خان، فضل محمد خان، شوکت علی، فخر زمان خان، فرخ حبیب، اعجاز احمد شاہ، جمیل احمد خان، محمد اکرم چیمہ، عبدل شکور شاد، ڈاکٹر شیریں مزاری اور شاندانہ گلزار خان کے استعفے منظور کیے گئے ہیں۔

استعفے منظور کیے جانے کے معاملے پر رہنما تحریک انصاف فرخ حبیب نے رد عمل کا اظہار لرتے ہوئے کہا کہ سازشیوں نے 11استعفے منظور کیے۔

انہوں نے کہا کہ قومی اسمبلی جس کو شہباز زرداری چورمافیا نےضمیر فروشوں کی چھانگا مانگا کی منڈی بنا دیا اس میں سے تحریک انصاف کےسب اراکین کے ساتھ اپنا استعفیٰ 10اپریل کو ہی دے چکے تھے۔

فرخ حبیب کا مزید کہنا تھا کہ عمران خان کی قیادت میں غلامی کے خلاف حقیقی آزادی کے لیے 100باربھی ایسی قومی اسمبلی کئ نشست قربان کرسکتا ہوں۔