فارن فنڈنگ کیس کافیصلہ نہیں آتا تو الیکشن کمیشن کے سامنے دھرنادیں گے:مریم نواز

پی ڈی ایم اجلاس کے بعد میڈیا سے گفتگو کرتے ہوئے مریم نواز نے کہا کہ نوازشریف کیلئے آئین کی تشریح کچھ اور عمران خان کے لیے کچھ اور ہے، اب مزاحمت کرنا پڑے گی، پرویزالہیٰ کی وزارت اعلیٰ 3 رکنی بینچ کی دین ہے۔

انہوں نے کہا کہ عدالت کا کام آئین سازی کرنا نہیں،عمران خان کے لیے اداروں کے وقار کو قربان نہیں ہونے دیں گے، عدالت سے وزیراعلیٰ بننے والے کے لیے ٹھہرنا مشکل ہوجائے گا،کچھ بھی کرلیں پرویز الٰہی ہمیشہ عدالتی وزیراعلیٰ کہلائیں گے۔

مریم نواز نے کہا کہ ادارے کی توہین باہر سے نہیں اندر سے ہوتی ہے، اس طرح کے فیصلوں سے ادارے کی توہین کی جاتی ہے، آپ سمجھیں گے کہ اس قسم کے فیصلے ہم سرجھکا کر تسلیم کرلیں گے تو ایسا نہیں ہوگا، عمران خان کا ڈپٹی اسپیکر ہو تو اسے نہیں بلایا جاتا۔

ان کا کہنا تھا کہ پاکستان میں ایک ہی چیز محفوظ ہے وہ ہے فارن فنڈنگ کیس، عمران خان نے ساڑھے 3 سو انٹرنیشنل کمپنیوں سے فنڈنگ لی۔ ان کمپنیوں میں بھارتی اور اسرائیلی کمپنیاں شامل ہیں۔

مریم نواز نے مزید کہا کہ  عمران خان اپنے ملازمین کے اکاؤنٹ میں باہر سے پیسے منگواتے رہے، اگر فضل الرحمان یا نواز شریف نے فنڈنگ لی ہوتی تو بغیر تاخیر فیصلے کیے جانے تھے۔