سبطین خان اسپیکر کے انتخاب میں بھاری اکثریت سے کامیاب ہوں گے:پرویز الہٰی

تفصیلات کے مطابق وزیر اعلی پنجاب چودھری پرویز الٰہی کی زیر صدارت تحریک انصاف اور مسلم لیگ ق کی صوبائی پارلیمانی پارٹی کا مشترکہ اجلاس ہوا۔

اجلاس میں پی ٹی آئی کے نائب چیئرمین شاہ محمود قریشی، سابق گورنر پنجاب عمر سرفراز چیمہ سمیت تحریک انصاف اور مسلم لیگ ق کے اراکین پنجاب اسمبلی نے بھرپور شرکت کی، شرکاء نے سبطین خان کو اسپیکر کے انتخاب میں کامیاب کروانے کے عزم کا اظہار کیا۔

اجلاس میں شرکا نے چودھری پرویزالہٰی کو وزارت اعلیٰ کا منصب سنبھالنے پر مبارکباد پیش کی اور اسپیکر پنجاب اسمبلی کے انتخاب میں سبطین خان کو کامیاب کرانے کیلئے حکمت عملی طے کی گئی۔

اس موقع پر سبطین خان نے کہا کہ  یہ میرا الیکشن نہیں، پارٹی کا الیکشن ہے،ہم متحد ہیں، کل جب پرویز الہیٰ کا الیکشن تھا تب بھی ڈٹے تھے آج بھی ڈٹے ہیں، کل میں جیتا تو عمران خان اور چودھری پرویز الہیٰ جیتیں گے۔

اس موقع پر شاہ محمود قریشی نے کہا کہ دوست مزاری کی غیر قانونی رولنگ کے خلاف سپریم کورٹ کا فیصلہ تاریخی تھا،سبطین خان کو منتخب کرنا ہےاور ڈپٹی اسپیکر پنجاب اسمبلی دوست مزاری کو فارغ کرنا ہے۔

خیال رہے کہ چودھری پرویزالہٰی کے وزیراعلیٰ بننے کے بعد اسپیکر پنجاب اسمبلی کی نشست خالی ہو چکی ہے جس پر جمعہ 29 جولائی کو شام 4 بجے انتخاب کا عمل ہوگا۔ سبطین خان تحریک انصاف اور ق لیگ کے مشترکہ امیدوار ہیں۔