وزیر خارجہ شاہ محمود قریشی کا امریکی ہم منصب سے رابطہ، باہمی دلچسپی کے امور پر تبادلہ خیال

تفصیلات کے مطابق وزیر خارجہ شاہ محمود قریشی  نے امریکی ہم منصب انتھونی بلنکن کے ساتھ  دو طرفہ تعلقات سمیت  باہمی دلچسپی کے اُمور پر تبادلہ خیال کیا۔   وزیر خارجہ شاہ محمود قریشی نے امریکی وزیر خارجہ انتھونی بلنکن  کو منصب سنبھالنے پر مبارکباد دی۔ ان کا کہنا تھا کہ پاکستان، امریکہ کے ساتھ باہمی دلچسپی کےامور پر جامع شراکت داری کے قیام کیلئے پرعزم ہے۔امریکی صحافی ڈینیئل پرل قتل کیس میں حالیہ پیش رفت کے تناظر میں وزیر خارجہ نے زور دیا کہ قانونی تقاضوں کے ذریعے انصاف کی فراہمی دونوں ممالک کے مفاد میں ہے۔

شاہ محمود قریشی کا کہنا تھا کہ پاکستان اور امریکہ جامع مذاکرات کے ذریعے افغان مسئلے کے سیاسی حل کے متمنی ہیں۔ ضرورت اس امر کی ہے کہ افغانستان میں پرتشدد واقعات میں کمی لائی جائے تاکہ افغان مسئلے کے پرامن سیاسی حل کی راہیں ہموار ہوں۔

واضح رہے کہ  انتھونی بلنکن نے 26 جنوری کو 71 ویں امریکی سیکریٹری آف اسٹیٹ کا حلف اٹھایا تھا۔