الیکشن کمیشن نے تحریک انصاف پر احمقانہ الزامات لگائے ہیں:عمران خان

نجی نیوز چینل کو دییے گئے اپنے ایک انٹرویو میں سابق وزیر اعظم نے کہا کہ آرمی چیف کی تعیناتی سے زیادہ ملکی معیشت ضروری ہے، ہمیں نومبر کو سوچنے کے بجائے ابھی کا سوچنا چاہیے کیونکہ حالات بہت خراب ہیں، مہنگائی دن بہ دن بڑھتی جارہی ہے، عوام کی پریشانیوں میں اضافہ ہوتا جارہا ہے تو ایسی صورت میں ہمیں معیشت کا سوچنا چاہیے، ہمارے ملک کی پوزیشن ہر گزرتے دن کے ساتھ نیچے جارہی ہے۔

سابق وزیر اعظم نے کہا کہ تمام مسائل کا واحد حل فوری اور شفاف انتخابات ہیں، نیوٹرلز کی گارنٹی پر چیف الیکشن کمشنر کو لگایا جو بڑی غلطی تھی، الیکشن کمیشن حکومت کے ساتھ سازش میں ملوث ہے، ن لیگ اور پیپلز پارٹی کے فنڈ سامنے کیوں نہیں آ رہے، دونوں جماعتوں نے سیٹھ پالے ہوئے ہیں، جن سے یہ پیسے لیتے ہیں۔

انہوں نے کہا کہ کسی قانون میں نہیں لکھا کہ اوورسیز پاکستانیوں سے فنڈ نہیں لیے جا سکتے، الیکشن کمیشن نے تحریک انصاف پر احمقانہ الزامات لگائے، الیکشن کمیشن سندھ کا ممبر دو جگہ سے تنخواہ لے رہا ہے اور وہ  باقاعدہ سندھ حکومت کا ملازم ہے، ہم الیکشن کمشنر کے خلاف سپریم جوڈیشنل کونسل میں جائیں گے اور کل الیکشن کمیشن کے باہر پُرامن احتجاج بھی کریں گے۔

سابق وزیر اعظم نے اپنی گفتگو میں کہا کہ حکومت الیکشن کی تاریخ کا اعلان کردے تو ہم ان کے ساتھ بیٹھ کر بات کرنے کے لیے بھی تیار ہیں، ن لیگ، پی پی کے ذہن میں بس ایک بات ہے کہ کسی بھی طرح تحریک انصاف کو کھیل سے باہر کردیں مگر یہ کامیاب نہیں ہوں گے کیونکہ عوام ہمارے ساتھ ہیں۔