عمران خان نے 21 رکنی پنجاب کابینہ کو حتمی شکل دے دی

تفصیلات کے مطابق سابق وزیر اعظم عمران خان نے 21 رکنی پنجاب کابینہ کو حتمی شکل دے دی ہے جس کا با ضابطہ اعلان کل پرویزالہٰی اور مونس الہٰی کی مشاورت کے بعد ہوگا۔

سابق وزیر اعظم نے پنجاب کابینہ میں شامل ہونے والے وزراء سے ویڈیو لنک کے ذریعے ایوان وزیراعلیٰ میں خطاب کیا، کابینہ میں لاہورسے ڈاکٹر یاسمین راشد، میاں اسلم اقبال، میاں محمود الرشید، مراد راس شامل ہیں۔

فیصل آباد سے علی افضل ساہی اور لطیف نذر کو کابینہ میں شامل کرلیا گیا جبکہ راولپنڈی سے راجہ بشارت، جنوبی پنجاب سے نوابزداہ منصور، سردار محسن لغاری بھی پنجاب کابینہ کا حصہ ہوں گے۔

علاوہ ازیں غضنفر عباس چھینہ، سردار شہاب الدین، سردار حسنین بہادر دریشک، عنصر مجید نیازی، ملک تیمور، منیب چیمہ اور علی عباس شاہ بھی پنجاب کابینہ کاحصہ ہوں گے۔

پنجاب کابینہ کی حتمی منظوری کا اعلان کل وزیراعلیٰ پنجاب چودھری پرویز الٰہی، چیئرمین تحریک انصاف عمران خان اور سابق وفاقی وزیر مونس الہٰی مشاورت کے بعد کیا جائے گا۔

خطاب میں سابق وزیر اعظم عمران خان نے نامزد وزراء کو پیشگی خبردار کیا کہ کرپشن برداشت نہیں ہوگی،واضح فرق نظرآنا چاہیے ہماری حکومت عوام کے لیے کام کررہی ہے۔ وقت پر دفاتر آنا ہے، کوئی چھٹی نہیں ہوگی، آفس میں وقت دیں گے تو بیورو کریسی بھی وقت پرآئے گی۔