اسلام آباد: پی ٹی آئی کا مظاہرہ، ریڈ زون میں کنٹینرز پہنچا دیے گئے

ضلعی انتظایہ نے پی ٹی آئی مظاہرے کے پیش نظر ریڈ زون کے داخلی راستوں پر کنٹینرز لگائے ہیں۔

اسلام آباد پولیس کے مطابق مظاہرین یا کسی بھی غیر متعلقہ شخص کو ریڈ زون میں داخلے کی اجازت نہیں ہوگی، اینٹی رائٹس فورس، رینجرز، ایف سی اور پولیس ریڈزون میں تعینات ہوگی۔

پولیس کے مطابق ریڈ زون میں داخلے کے لیے صرف مارگلہ روڈ کھلا رہے گا۔

چیئرمین پی ٹی آئی عمران خان کی کال پر جمعرات کو سہ پہر 3 بجے نادرہ چوک اسلام آباد پر احتجاجی مظاہرہ کیا جائے گا۔ جس کی قیادت اسد عمر کریں گے۔

پی ٹی آئی رہنما اور کارکنان اکٹھے ہوکر فارن فنڈنگ کیس کے خلاف الیکشن کمیشن کے باہر جانے کا ارادہ رکھتے ہیں۔

پارٹی قیادت کا کہنا ہے کہ یہ پرامن احتجاج ہوگا، فورسز سے ٹکراؤ یا کسی توڑ پھوڑ پر یقین نہیں رکھتے۔

ادھر وفاقی وزیرداخلہ رانا ثناء اللّٰہ نے کہا ہے کہ پی ٹی آئی کل احتجاج کے نام پر انتشار پھیلانا چاہتی ہے، یہ الیکشن کمیشن پر حملہ آور ہوسکتے ہیں۔

انہوں نے کہا کہ کچھ رپورٹس ملی ہیں، عمران خان اور فواد چوہدری کا بیان بھی آیا، رپورٹس کے مطابق یہ الیکشن کمیشن کے سامنے بے نظمی کا ارادہ رکھتے ہیں۔