آئندہ 48 گھنٹے میں اسلام آباد میں بڑے جلسے کا اعلان کیا جائے گا:فواد چودھری

رہنما پاکستان تحریک انصاف فواد چودھری نے اسلام آباد میں پریس کانفرنس کرتے ہوئے کہا کہ آئندہ 48 گھنٹے میں اسلام آباد میں بڑے اجتماع کی تاریخ کا اعلان کیا جائے گا جس میں حکومت کو اسمبلیاں تحلیل کرنے کی ڈیڈلائن دیں گے، موجودہ حکومت کو 1 ماہ سے زائد کا وقت نہیں دے سکتے۔

انہوں نے الیکشن کمشنر سے مستعفی ہونے کا مطالبہ کرتے ہوئے کہا کہ الیکشن کمیشن پر کسی کو بھی یقین نہیں، الیکشن کمیشن ن لیگ کی پارٹی بناہواہے، الیکشن کمیشن کی فوری تبدیلی ناگزیر ہے،ممکن نہیں کہ موجودہ الیکشن کمشنرعام انتخابات کروائیں، عدالتی نوٹس کے بعد الیکشن کمیشن کو عدالت کا احترام کرنا چاہیے تھا۔

فواد چودھری نے کہا کہ اسمبلیاں تحلیل کرنےسےمتعلق حکومت کی جانب سے سنجیدگی کا مظاہرہ نہیں کیا جا رہا، حکومت کی طرف سے گفتگو میں کوئی سنجیدگی نہیں دکھائی جا رہی، حکومت عام انتخابات کرانے کے لیے سنجیدہ نہیں۔

سابق وفاقی وزیر نے  وزارت خارجہ سے افغانستان میں ہونے والے ڈرون حملے پر وضاحت مانگتے ہوئے کہا کہ افغانستان میں جو حملہ ہوا اس میں پاکستان کی سر زمین استعمال ہوئی یا نہیں، افغانستان حملے سے متعلق واضح بیان آنا ضروری ہے، قوم کو بتایا جائے ورہ احتجاج کا حق حاصل ہے۔