حکومت نے بارش اور سیلاب سے متاثرہ علاقوں میں ایمرجنسی نافذ کردی

تفصیلات کے مطابق  سیلاب سے متاثرہ علاقوں میں امداد اور بحالی کی سرگرمیوں کے جائزہ اجلاس کی صدارت کرتے ہوئے وزیراعظم نے کہا کہ ہمیں سیاسی مفادات کو بالائے طاق رکھ کر متاثرہ لوگوں کی مدد کرنی چاہئے ۔ سیلاب متاثرین کی ریسکیو، ریلیف اوربحالی ایک قومی فریضہ ہے،  ہم سیاست بعد میں کریں گے، ابھی ان لوگوں کی مشکلات کامداواکرنے کاوقت ہے جو سخت مشکل میں ہیں۔ 

وزیراعظم نے وزارت خزانہ کو ہدایت کی کہ اس سلسلے میں قدرتی آفات سے پیدا ہونے والی صورتحال سے نمٹنے کے قومی ادارے کو فوری طورپر پانچ ارب روپے جاری کئے جائیں۔

انہوں نے قدرتی آفات سے نمٹنے کے قومی اور صوبائی اداروں کے درمیان رابطے کیلئے اعلی سطح کی ایک کمیٹی تشکیل دی تاکہ امداد اور بچاؤ کی کارروائیاں موثر طریقے سے سرانجام دی جاسکیں۔

وزیراعظم نے کہا کہ ماحولیاتی تبدیلی کے تناظر میں وسط اور طویل مدت کی پالیسیاں تشکیل دینے کی ضرورت ہے ۔

انہوں نے صوبائی حکومتوں کو ہدایت کی کہ وہ بارشوں اور سیلاب سے ہونے والے نقصانات کا درست تخمینہ لگانے کیلئے وفاقی حکومت کو مصدقہ رپورٹس جمع کرائیں۔

وزیراعظم نے کہا کہ نقصانات کا تخمینہ لگانے اور تباہ شدہ بنیادی ڈھانچے اور دیگر نقصانات کے ازالے کی ادائیگی کے لئے ایک مشترکہ سروے ناگزیر ہے۔

خیال رہے کہ وزیراعظم شہباز شریف نے بلوچستان، خیبرپختونخوا اور پنجاب کے سیلاب سے متاثرہ علاقوں کے دورے کیے ہیں اور خود نقصانات کا جائزہ لیا ہے۔