عمران خان کیخلاف توہین عدالت کیس کی سماعت آج ہوگی 

تفصیلات کے مطابق  جسٹس محسن اختر کیانی کی سربراہی میں تین رکنی لارجر بینچ  آج دوپہر کیس  کی سماعت کرے گا ۔ اسلام آباد ہائی کورٹ نے سابق وزیراعظم اور تحریک انصاف کے سربراہ عمران خان کی جانب سے ایڈیشنل سیشن جج زیبا چوہدری کو دھمکانے کا نوٹس لیا تھا۔

توہین عدالت کی کارروائی کا فیصلہ گزشتہ روز رجسٹرار ہائی کورٹ کی جانب سے عمران خان کی تقریر کے بارے مواد پیش کرنے کے بعد   ہائیکورٹ کے تمام ججز کی مشاورت سے ہوا تھا.  جس کے بعد اسلام آباد ہائی کورٹ نے توہین عدالت کیس کی سماعت کے لیے لارجر بینچ تشکیل دیا تھا۔ 

قبل ازیں اسلام آباد ہائی کورٹ نے عمران خان کی دہشت گردی کی دفعات کے تحت درج مقدمے میں 25 اگست تک  عبوری  ضمانت منظور کر لی تھی۔

خیال رہےکہ 20  اگست کو پاکستان تحریک انصاف کے چیئرمین عمران خان نے شہباز گل پر مبینہ تشدد کے خلاف آئی جی اور ڈی آئی جی اسلام آباد پرکیس کرنےکا اعلان کیا تھا اور دوران خطاب عمران خان نے شہباز گل کا ریمانڈ دینے والی خاتون مجسٹریٹ زیبا چوہدری کو نام لےکر دھمکی بھی دی تھی۔