کراچی سمیت ملک بھر میں مزید بارشوں کی پیش گوئی

تفصیلات  کے مطابق محکمہ موسمیات نے رواں ہفتے کے دوران ملک کے کئی حصوں میں موسلادھار بارشوں کے ایک اور اسپیل کی پیش گوئی کردی ہے تاہم رواں ہفتے کے آخر میں مون سون سسٹم کے دباؤ میں کمی آسکتی ہے۔

محکمہ موسمیات  کے مطابق موسمی نظام کے زیر اثر سندھ، جنوبی پنجاب، جنوبی اور شمال مشرقی بلوچستان میں 24 سے 26 اگست کے دوران وقفے وقفے سے مزید بارش، آندھی اور گرج چمک کے ساتھ بارش کا امکان ہے۔

اس دوران خیبرپختونخوا، پنجاب، کشمیر اور گلگت بلتستان میں بھی وقفے وقفے سے بارش، آندھی اور گرج چمک کے ساتھ بارش کا امکان ہے۔

محکمہ موسمیات نے خبردار کیا ہے کہ 24 سے 26 اگست کو کراچی، حیدرآباد، ٹنڈو جام، ٹھٹھہ، بدین، میرپورخاص، سانگھڑ، خیرپور، شہید بینظیر آباد، دادو، نوشہرو فیروز، لاڑکانہ، جیکب آباد اور سکھر میں شدید بارشوں سے سیلاب آسکتا ہے۔

محکمہ موسمیات کے مطابق موسلا دھار بارش سے راولپنڈی اور اسلام آباد، بہاولپور، ملتان، لاہور اور گوجرانوالہ میں 24 اور 25 اگست کو سیلاب آسکتا ہے جبکہ 24 سے 26 اگست کے دوران اسلام آباد، راولپنڈی، ایبٹ آباد، مانسہرہ، دیر، کرک، لکی مروت، بنوں اور کشمیر کے نالوں میں سیلاب کا امکان ہے۔

بارش سے آزاد کشمیر، خیبرپختونخوا کے پہاڑی علاقوں، گلیات، مری، چلاس، دیامیر، گلگت، ہنزہ، استور، غذر اور اسکردو میں لینڈ سلائیڈنگ  کا خدشہ ہے ۔

محکمہ موسمیات  کی جانب سے  مسافروں اور سیاحوں کو محتاط رہنے کا مشورہ دیا ہے جبکہ متعلقہ حکام کو الرٹ رہنے اور ضروری احتیاطی تدابیر اختیار کرنے کی ہدایت کی گئی ہے۔