سوات میں سیلا بی ریلوں نے تباہی مچادی ،  ایمرجنسی نافذ

تفصیلات کے مطابق  سوات  میں  سیلابی ریلے سے  بحرین مدین میں متعدد عمارتیں دریا برد ہو گئیں ، مٹہ، سخرہ، لالکو میں رابطہ پل اور متعدد مکانات کو نقصان پہنچا ہے ۔ دریائے سوات میں اونچے درجے کے سیلاب کے پیش نظر انتظامیہ نے دریا کے کنارے آباد لوگوں کو نقل مکانی کی ہدایات جاری کر دی ہیں۔

 ٹانک اور نوشہرہ  کو بھی آفت زدہ ضلع قرار دیدیا گیا ہے ، سیلاب سے 90 فیصد علاقہ بری طرح متاثر ہوا ہے، خاتون سمیت مزید 3 افراد سیلابی ریلوں میں بہہ گئے۔

وزیر اعلیٰ خیبر پختونخوا محمود خان  کی  ہدایت پر محکمہ ریلیف نے ایمرجنسی کے نفاذ کا باقاعدہ اعلامیہ جاری کر دیا، سوات کے سیلاب سے متاثرہ علاقوں میں امدادی سرگرمیوں کے لیے 30 اگست ایمرجنسی نافذ العمل رہے گی۔

 وزیر اعلیٰ خیبر پختونخوا محمود خان   نے  ضلعی انتظامیہ کو ہدایت کی کہ متاثرہ علاقوں میں ریلیف سرگرمیاں تیز  کی جائیں ، سیلاب متاثرین کو کھانے پینے سمیت تمام  اشیائے ضروریہ کی فراہمی کے لئے ہنگامی بنیادوں پر اقدامات کئے جائیں۔ 

وزیراعلی ٰ کے پی محمود خان نے کہا کہ  متعلقہ ضلعی انتظامیہ ہر متاثرہ  شخص تک رسائی کو یقینی بنائے ،   متاثرہ خاندانوں کے تمام نقصانات کا ازالہ کرنے کی ہر ممکن کوشش کی جائے گی ، سیلاب زدہ علاقوں میں  متاثرہ انفراسٹرکچر کی بحالی کے لئے ضلعی انتظامیہ کو ضروری احکامات دیئے گئے ہیں۔ 

انہوں نے کہا کہ مشکل کی اس گھڑی میں صوبائی حکومت متاثرین کے ساتھ ہے،  سیلاب متاثرین کو کسی صورت تنہا نہیں چھوڑا جائے گا،   متاثرین کی مدد اور بحالی کے لئے تمام دستیاب وسائل بروئے کار لائے جائیں گے۔