حالیہ سیلاب سے ہونیوالے  نقصانات پر دل خون کے آنسو رورہا ہے : عمران خان

تفصیلات کے مطابق چیئرمین پی ٹی آئی عمران خان اور وزیراعلیٰ کے پی  سیلاب سے متاثرہ ضلع ڈی آئی خان پہنچ گئے ہیں  ، وہاں سے سیلاب سے متاثرہ ضلع ٹانک کا بھی دورہ کریں گے ۔

دورے کے دوران عمران خان اور محمودخان متاثرہ اضلاع میں سیلاب متاثرین سے ملاقات بھی کریں گے اور ساتھ ہی سیلاب کے نقصانات اور امدادی سرگرمیوں کا جائزہ لیں گے۔

اس موقع پر پی ٹی آئی چئیرمین  عمران خان نے کہا کہ حالیہ سیلاب سے نقصانات پر دل خون کے آنسو رورہا ہے ، بارشوں سے ملک بھر میں بڑے پیمانے پر نقصانات ہوئے ہیں۔ مشکل کی اس گھڑی میں عوام کو تنہا نہیں چھوڑوں گا، ہم سب کو سیلاب زدگان کی خدمت کرنی چاہیے، 

انہوں نے کہا کہ  اس حکومت نے مہنگائی کے سارے ریکارڈ توڑ دئیے ہیں ، بہت بڑا علاقہ اس وقت سیلاب سے متاثر ہے ، اگرہمارے پاس ڈیم ہوں تو پانی کو ذخیرہ کیا جاسکتا ہے۔ 

واضح رہے کہ ملک  بھر میں  مون سون بارشوں اور سیلاب کی وجہ سے تباہ کاریوں کا سلسلہ جاری ہے،  خیبرپختونخوا کے مختلف علاقوں  میں سیلابی ریلوں نے تباہی مچادی ہے اور صورتحال کے پیش نظر سوات، نوشہرہ ، چارسدہ  میں ایمرجنسی نافذ  کردی گئی۔