آئی ایم ایف کا پاکستان سے پیٹرولیم مصنوعات کی قیمتوں میں فوری اضافہ کرنے کا مطالبہ 

اسلام آباد: ایران پر امریکی و اسرائیلی حملے اور آبنائے ہرمز کی بندش کے بعد دنیا بھر بالخصوص جنوبی ایشیا میں توانائی کے شدید بحران کا اندیشہ ظاہر کیا جا رہا ہے جس کے بعد عالمی مالیاتی ادارے( آئی ایم ایف ) نے بھی پاکستان سے پٹرولیم مصنوعات کی قیمتوں میں اضافے کا مطالبہ کر دیا ہے۔

تفصیلات کے مطابق پاکستان اور آئی ایم ایف کے درمیان ورچوئل مذاکرات میں آئی ایم ایف نے حکومت پر زور دیا کہ پٹرولیم مصنوعات پر سبسڈی نہ دی جائے اور قیمتوں میں اضافے کا بوجھ فوری طور پر عوام پر منتقل کیا جائے۔  

رپورٹس کے مطابق مذاکرات میں یہ بھی تجویز دی گئی کہ پٹرول اور ڈیزل پر موجود پٹرولیم ڈویلپمنٹ لیوی کے اہداف برقرار رکھے جائیں۔

اس کے علاوہ کرنٹ اکاؤنٹ خسارہ کنٹرول کرنے کے لیے تجاویز پر بھی تبادلہ خیال کیا گیا ہے۔ مذاکرات میں اسکول اور کالجز کو آن لائن کلاسز پر منتقل کرنے، یونیورسٹیز اور سرکاری دفاتر کو اسمارٹ ورکنگ پر منتقل کرنے، دکانوں اور مارکیٹس کے اوقات مقرر کرنے، اور گروسری و ریستوران کے لیے ڈلیوری سروس اختیار کرنے کے اقدامات کی تجویز بھی دی گئی ہے۔

آئی ایم ایف کی سفارشات کے ساتھ ایک جامع عملدرآمدی منصوبہ بھی پیش کیا جائے گا تاکہ تمام تجاویز پر مؤثر عمل درآمد ممکن ہو سکے۔

واضح رہے کہ مالی سال کے آخر یعنی 30 جون تک 1468 ارب روپے لیوی جمع کرنے کا ہدف مقرر ہے، جس میں سے جولائی تا دسمبر کے 6 ماہ میں 822 ارب روپے (60 فیصد سے زائد) جمع کیے جا چکے ہیں۔