وزیر اعلیٰ پنجاب کا کھلاڑیوں کے اسٹیڈیم آنے جانے کیلئے زیر زمین ٹنل بنانے کا اعلان

چودھری پرویز الٰہی کے پرسنل ٹوئیٹر اکاؤنٹ سے جاری پیغام میں انہوں نے کہا کہ قذافی سٹیڈیم کے نزدیک ایک بلین ڈالر سے 25 منزلہ کمپلیکس تعمیر کیا جائے گا، نئے کمپلیکس میں پنجاب گورنمنٹ 30 فیصد اور 70 فیصد یو اے ای حکومت دے گی، کھلاڑیوں کے سٹیڈیم آنے جانے کیلئے زیر زمین ٹنل بنائی جائے گی، جدید کمپلیکس بننے سے کرکٹ کے میچ دبئی کی بجائے لاہور میں کرانا آسان ہوگا۔

سلسلہ وار ٹوئیٹس میں وزیر اعلیٰ پنجاب نے کہا کہ سپورٹس کے شعبے میں گولڈمیڈل کی خوشی ملنا قابل تحسین ہے، گوجرانوالہ، لاہور، ملتان سمیت 4 شہروں میں پہلوانوں کے لیے جم اور کمپلیکس بنائیں گے، بڑے ادارے کھلاڑیوں کو ملازمتیں دیں تاکہ وہ روزگار سے بے فکر ہو کر کام کر سکیں۔

انہوں نے کہا کہ نجی یونیورسٹیوں میں سپورٹس کے فروغ کیلئے وائس چانسلرز کو بلا رہا ہوں، بچو ں کے ٹیلنٹ کو اجاگر کرنے کیلئے غیر ملکی اور اچھے کوچ لائیں گے، ماضی میں نظر انداز سپورٹس کے شعبے کو دوبارہ بحال اور فنکشنل کریں گے۔

وزیر اعلیٰ پنجاب کا مزید کہنا تھا کہ کبڈی کے کھلاڑیوں کیلئے جہاں سے بھی اچھا کوچ ملے گا لے کر آئیں گے، خواتین کو کرکٹ کے علاوہ دیگر کھیلوں میں کوچنگ اور حوصلہ افزائی کریں گے، حکومت پنجاب سپورٹس کے شعبے کو نظر انداز نہیں کرے گی۔