ابوظہبی: مصفحہ کے انڈسٹریل ایریا میں خوفناک آتشزدگی

 ابوظہبی کے ایک گودام میں آگ لگ گئی، ابوظہبی پولیس نے سوشل میڈیا پراس واقعے کی اطلاع دی۔ خلیجی میڈیا کے مطابق پولیس حکام نے بتایا ہے کہ متحدہ عرب امارات کے دارالحکومت ابوظہبی کے ایک گودام میں آگ لگ گئی،

حکام نے پھیلاؤ پر قابو پالیا ہے اور سائٹ کو ٹھنڈا کر رہے ہیں۔ بتایا گیا ہے کہ ابوظہبی پولیس نے مصفحہ انڈسٹریل ایریا میں آگ لگنے کی اطلاع دی،  آگ ایک اسکریپ کے گودام میں لگی، ابوظہبی پولیس اور سول ڈیفنس نے آگ پر قابو پا لیا اور اسے بجھا دیا، آتشزدگی کے اس واقعے میں کسی کے زخمی یا جانی نقصان کی اطلاع نہیں ہے۔ 

اس ضمن میں کہا گیا ہے کہ حکام واقعے کی وجوہات کی تحقیقات کر رہے ہیں، عوام سے گزارش ہے کہ وہ صرف سرکاری ذرائع سے ملنے والی معلومات پر عمل کریں۔

چند روز قبل فجیرہ میں البتھانہ کے علاقے میں تیل کے ٹینکر میں آگ بھڑک اٹھی تھی جس کے بعد فجیرہ پولیس نے شیخ مکتوم اسٹریٹ کو البتھانہ کے علاقے سے الفرف راؤنڈ اباؤٹ تک دونوں سمتوں میں بند کردیا، فجیرہ پولیس کو حادثے کی اطلاع دینے والی کال موصول ہوئی تھی اور فائر فائٹرز کے ساتھ پولیس گشت کو بھی فوری طور پر جائے وقوعہ پر بھیجا گیا جہاں سرچ اینڈ ریسکیو ٹیم نے بروقت کارروائی کرتے ہوئے زخمیوں کو ضروری علاج کے لیے فجیرہ ہسپتال منتقل کردیا۔ 

قبل ازیں 3 اگست کو متحدہ عرب امارات کی ریاست شارجہ کے انڈسٹریل ایریا میں آٹو اسپیئر پارٹس کے دو گوداموں میں آتشزدگی کا واقعہ پیش آیا ، شارجہ کے انڈسٹریل ایریا فور میں بدھ کے روز دو گوداموں میں آگ لگ گئی جن میں گاڑیوں کے اسپیئر پارٹس تھے، دبئی، شارجہ اور عجمان کی طرف سفر کرنے والوں نے گوداموں سے دھوئیں کے گہرے سیاہ بادل اُٹھنے کی اطلاع دی۔ 

شارجہ سول ڈیفنس کے ایک ترجمان نے بتایا کہ انہیں صبح 11 بج کر 19 منٹ پر ایک کال موصول ہوئی، جس پر انہوں نے فوری طور پر 3 فائر اسٹیشنوں ( المینا، سمنان اور النہدہ پوائنٹ ) سے فائر فائٹرز کو جائے وقوعہ پر بھیجا، پولیس نے سول ڈیفنس کو آگ پر جلد قابو پانے کی اجازت دینے کے لیے علاقے کو گھیرے میں لے لیا تاہم فوری طور پر یہ واضح نہیں ہو سکا کہ آگ کس وجہ سے لگی جب کہ فائر فائٹرز نے آگ پر قابو پا لیا ، اس دوران کوئی جانی نقصان نہیں ہوا جب کہ جائے وقوعہ کو فرانزک ماہرین کے حوالے کر دیا گیا تاکہ آگ لگنے کی وجوہات کا تعین کیا جاسکے۔