چین میں زلزلے سے ہلاکتوں کی تعداد 74 ہوگئی 

غیر ملکی خبر ایجنسی کے مطابق صوبہ سیچوان میں زلزلے کے بعد آفٹر شاکس کا سلسلہ جاری ہے اور ہلاکتوں کی تعداد 74  تک پہنچ گئی ہے۔

خبر ایجنسی کی ایک رپورٹ کے مطابق  زلزلے کے نتیجے  میں 259 افراد زخمی ہوئے جبکہ 26 افراد تاحال لاپتہ ہیں جن کیلئے سرچ  آپریشن جاری ہے ۔

زلزلے سے متاثرہ علاقوں میں سڑکیں مرمت کرکے ٹریفک کے لیے بحال کر دی گئی ہیں۔

 حالیہ زلزلے کو صوبے سیچوان میں 2017 کے بعد سے آنے والا سب سے شدید زلزلہ قرار دیا جا رہا ہے  جس نے  متعدد عمارتیں تباہ کر دیں اور بجلی اور پانی کے بنیادی ڈھانچے کے ساتھ ساتھ ٹیلی کمیونیکیشن کو بھی شدید نقصان پہنچایا ہے۔

سیچوان میں  پیر کے روز  6.8 شدت کا زلزلہ آیا تھا ، امریکی زلزلہ پیما مرکز کے مطابق زلزلہ زیر زمین 10 کلومیٹر کی گہرائی میں آیا،

زلزلے سے متعدد مکانات کو نقصان پہنچا اور کئی علاقوں میں لینڈ سلائیڈنگ کے واقعات بھی پیش آئے۔

یاد رہے کہ  چین کا سب سے مہلک زلزلہ 2008 میں 7.9 شدت کا زلزلہ تھا جس میں سیچوان میں ہی  تقریباً 90,000 افراد ہلاک ہوئے تھے۔