عمران خان کیخلاف توہین عدالت کیس کی سماعت آج ہوگی

تفصیلات کے مطابق چیف جسٹس اطہر من اللہ کی سربراہی میں پانچ رکنی لارجر بینچ کیس کی سماعت کرے گا ،  گزشتہ روز عمران خان نے اسلام آباد ہائی کورٹ میں نیا تحریری جواب جمع کرایا جو کہ 19 صفحات پر مشتمل ہے۔ 

توہین عدالت کیس میں عمران خان آج ذاتی حیثیت میں پیش ہونگے، چیرمین پی ٹی آئی   نے ضمنی جواب میں عدالت شوکاز نوٹس واپس لینے کی استدعا کی ہے ۔ 

عمران خان کی پیشی کے حوالے اسلام آباد ہائی کورٹ کے رجسٹرار آفس کا خصوصی سرکلر بھی جاری  کردیاگیا ۔ 

ضمنی جواب میں سابق وزیراعظم عمران خان  نے خاتون جج سے متعلق بیان پر اظہار افسوس کیا ہے ، عمران خان نے اپنے جواب میں کہا کہ حوصلہ افزا بات ہے کہ مجھے اپنا مؤقف پیش کرنے کا موقع دیا گیا، میں نے ہمیشہ اداروں کی عزت پر مبنی رائے کا اظہار کیا ہے۔

یاد رہے کہ اسلام آباد ہائی کورٹ نے عمران خان کو ایڈیشنل سیشن جج زیبا چودھری سے متعلق ’دھمکی آمیز‘ بیان دینے پر توہین عدالت کا نوٹس جاری کرتے ہوئے ذاتی حیثیت میں طلب کر رکھا تھا ۔   

توہین عدالت کے مقدمے میں سابق وزیراعظم عمران خان کی اسلام آباد ہائیکورٹ میں پیشی کے موقع پر غیرمعمولی حفاظتی اقدامات کیے گئے ہیں  ۔