مریم نواز کی پاسپورٹ واپسی کی درخواست،بینچ نے سماعت سے معذرت کر لی

نائب صدر ن لیگ مریم نواز کی پاسپورٹ واپسی کی درخواست، جسٹس انوار الحق پنوں نے درخواست کی سماعت سے انکار کر دیا ، کیس واپس چیف جسٹس لاہور ہائیکورٹ کو بھجوا دیا۔

تفصیلات کے مطابق لاہور ہائیکورٹ کے بینچ نے ن لیگ کی نائب صدر مریم نواز کی پاسپورٹ واپسی کی درخواست پر سماعت سے معذرت کر لی۔جسٹس علی باقر نجفی کی سربراہی میں جسٹس انوار الحق پنوں پر مشتمل دو رکنی بینچ نے درخوست پر سماعت کی۔ 

دو رکنی بینچ کے جسٹس انوار الحق پنوں نے مریم نواز کا کیس سننے سے معذرت کرتے ہوئے درخواست چیف جسٹس لاہور ہائیکورٹ کو بھجوا دی۔گذشتہ روز مریم نواز نے پاسپورٹ واپسی کیلئے دوبارہ لاہور ہائیکورٹ میں درخواست دائر کی،

درخواست میں مؤقف اپنایا گیا کہ چار سال سے پاسپورٹ عدالتی تحویل میں ہے،ابھی تک نیب چوہدری شوگر مل کا چالان پیش نہیں کر سکا۔ 

عدالت نے میرٹ پر ضمانت منظور کی،لمبے عرصے کیلئے کسی شخص کو اس کے بنیادی حق سے محروم نہیں رکھا جا سکتا۔ درخواست میں کہا گیا کہ پرویز مشرف اور ایان علی کے کیسز کے فیصلے اس کی نظیر ہیں۔

درخواست میں کہا گیا کہ کسی کو بنیادی آئینی حقوق سے غیر معینہ مدت تک محروم نہیں کیا جا سکتا۔کہیں فرار نہیں ہوں گی، ماں کو بستر مرگ پر چھوڑ کر پاکستان واپس آئی تھی۔ 

نیب قانون میں ملزم کے بیرون ملک جانے پر کوئی قدغن نہیں لگائی گئی۔مریم نواز نے درخواست میں مزید کہا کہ 7 کروڑ روپے بھی سیکیورٹی کے لیے جمع کرا رکھے ہیں۔

چوہدری شوگر ملز کیس میں میرٹ پر ضمانت ملی تھی۔ڈپٹی رجسٹرار جوڈیشل کو پاسپورٹ واپس کرنے کا حکم دیا جائے۔ لاہور ہائیکورٹ نے نائب صدر مسلم لیگ ن مریم نواز کی پاسپورٹ واپسی کی درخواست پر سماعت کیلئے 2 رکنی بنچ تشکیل دیا تھا۔