وزیراعظم اقوام متحدہ جنرل اسمبلی اجلاس میں شرکت کیلئے نیویارک پہنچ گئے

تفصیلات کے مطابق وزیراعظم شہبازشریف  نیویارک میں اپنے قیام کے دوران دیگر ملکوں کے رہنماؤں سے اہم دوطرفہ ملاقاتیں کرینگے۔

وزیراعظم آج اقوام متحدہ کے سیکرٹری جنرل کی طرف سے دیے جانے والے استقبالیے میں شرکت کریں گے اور فرانسیسی صدر ایمانوئیل میکخواں سے بھی ملاقات کریں گے۔

شہبازشریف آج آسٹریا کے چانسلر اور سپین کے صدر سے بھی ملاقاتیں کرینگے ۔ وہ یورپی یونین کونسل کے صدرچارلس Michael سے ملاقات کریں گے ۔ وزیراعظم غذائی تحفظ کے بارے میں عالمی سربراہ اجلاس میں بھی شرکت کرینگے۔

بدھ کے روز شہبازشریف آئی ایم ایف کی کی مینجنگ ڈائریکٹر کرسٹالینا جارجیوا اور عالمی بنک کے صدر ڈیوڈ ملز سے ملاقات کرینگے۔ شہبازشریف ترکیہ کے صدر رجب طیب اردوان اور ایران کے صدر سید ابراہیم رئیسی سے بھی ملاقات کریںگے ۔ وہ کل وہ ترکیہ کے صدر اور ان کی اہلیہ کے اعزاز میں ظہرانہ دیں گے۔

وزیراعظم کی دیگر مصروفیات میں ملائیشیا کے وزیراعظم اسماعیل صابری یعقوب، اقوام متحدہ کی جنرل اسمبلی کے صدر، مائیکروسافٹ کے بانی بل گیٹس، اقوام متحدہ کے سیکرٹری جنرل انتونیو گوتریس اور نوبل انعام یافتہ ملالہ یوسفزئی سے ملاقاتیں شامل ہیں۔

شہبازشریف چین، جاپان اور لکسمبرگ کے وزرائے اعظم سے بھی ملاقاتیں کرینگے۔وزیراعظم جمعہ کو اقوام متحدہ کی جنرل اسمبلی سے خطاب کرینگے۔امریکا میں اپنے قیام کے دوران شہبازشریف معروف امریکی صحافیوں کو انٹرویوز بھی دینگے۔

واضح رہے کہ وزیراعظم شہباز شریف جمعہ کی شب ملکہ برطانیہ کی آخری رسومات میں شرکت کیلئے لندن پہنچے تھے۔ وزیراعظم نے ویسٹ منسٹر ایبے میں ملکہ برطانیہ کی آخری رسومات میں پاکستان کی نمائندگی کی۔

لندن میں وزیراعظم شہباز شریف نے ہفتہ کو پارٹی قائد نواز شریف سے بھی ملاقات کی تھی۔