خواجہ آصف کیخلاف ہرجانے کا کیس: عمران خان پر دوسری بار جرمانہ عائد

تفصیلات کے مطابق اسلام آباد کی ایڈیشنل سیشن عدالت میں  چئیرمین پی ٹی آئی عمران خان کی جانب سے خواجہ آصف کے خلاف 10 ارب روپے ہرجانے کے کیس کی سماعت ہوئی۔

عمران خان کے وکلا کی جانب سے سماعت ملتوی کرنے کی استدعا کرتے ہوئے مؤقف اختیار کیا گیا کہ مرکزی وکیل بیرون ملک ہیں ،  جبکہ عمران خان میٹنگ میں شرکت کے باعث پیش نہیں ہوسکتے ۔

عدالت نے چیئرمین پی ٹی آئی عمران خان پر التوامانگنے پر ایک بار پھرجرمانہ عائد کردیا ۔ عمران خان کی سماعت ملتوی کرنے کی استدعا 5 ہزار روپے جرمانے کے ساتھ منظور کر لی گئی۔

عمران خان ، خواجہ آصف کے وکلا کی مشاورت کے بعد آئندہ سماعت کی تاریخ 22 اکتوبر مقرر کی گئی۔

خیال رہے کہ اس سے قبل بھی چیئرمین تحریک انصاف عمران خان کے وکیل کی استدعا پر سماعت ملتوی کی گئی تھی۔