پاکستان اور ترکیہ کا پاک ترک کلچر سینٹر قائم کرنے کا فیصلہ

تفصیلات کے مطابق استنبول میں اطلاعات و نشریات کی وزیر مریم اورنگزیب کی  ترکیہ کے ثقافت اور سیاحت کے نائب وزیر احمد مصباح اور فلمی صنعت کے وفد سے ملاقاتوں میں  یہ اتفاق رائے کیا گیا۔

وزیر اطلاعات نے اعلان کیا کہ پاکستان اپنی فلمیں پیش کرنے کیلئے ترکیہ میں ہونے والے فلم میلہ میں شرکت کرے گا۔ 

 انہوں نے کہا کہ پاکستان میں نئی بنائی گئی تین فلمیں اس فیسٹیول میں پیش کی جا سکتی ہیں ۔  فریقین نے پاکستان میں جدید ترین فلم پراسیسنگ لیب قائم کرنے اور فلم سازی اور اداکاری کو نصاب میں شامل کرنے کیلئے تعاون پر بھی اتفاق کیا۔

انہوں نے کہا کہ ہم نے موجودہ سال کے بجٹ میں فلمی صنعت، ثقافت اور سیاحت کے شعبوں پر عائد ٹیکس ختم کر دیا ہے ، غیر ملکی فلم سازوں کو مقامی سطح پر فلم اور ڈراموں کے مشترکہ منصوبوں پر بھی ٹیکس چھوٹ دی جا رہی ہے۔