ارشد شریف کی میت کو فیصل مسجد پہنچا دیا گیا

تفصیلات کے مطابق ارشد شریف کی نماز جنازہ فیصل مسجد میں 2 بجے ظہر کی نماز کے بعد ادا کی جائے گی ۔ ان  کی تدفین ایچ الیون قبرستان میں کی جائے گی۔

اس موقع پر فیصل مسجد میں سیکیورٹی کے انتہائی سخت انتظامات کیے گئے ہیں ، فیصل مسجد کے اطراف وفاقی پولیس اور ایف سی اہلکار تعینات ہیں جب کہ اور شہریوں کی بڑی تعداد بھی جنازہ گاہ میں پہنچ چکی ہے۔

پی ٹی آئی رہنما شبلی فراز، اعظم سواتی اور مراد سعید بھی جنازہ گاہ پہنچ چکے ہیں ان کے علاوہ دیگر سیاسی، سماجی شخصیات، صحافتی برادری سمیت مختلف شعبہ زندگی سے تعلق رکھنے والے افراد وہاں پہنچ رہے ہیں۔

یاد رہے کہ گزشتہ روز ارشد شریف کی میت کو کینیا سے پاکستان لایا گیا جس کے بعد پمز اسپتال اسلام آباد میں ان کا پوسٹ مارٹم کیا گیا۔  آٹھ رکنی میڈیکل بورڈ میں ارشد شریف کے اہل خانہ کی درخواست پر دو ڈاکٹرز شامل کیے گئے تھے۔