ارشد شریف کی زندگی کو پاکستان میں کوئی خطرہ نہیں تھا : ڈی جی آئی ایس آئی

تفصیلات کے مطابق راولپنڈی میں  ڈی جی آئی ایس پی آر کے ہمراہ پریس کانفرنس کے دوران ڈی جی آئی ایس آئی  لیفٹیننٹ جنرل ندیم انجم  نے کہا کہ ارشد شریف بہت قابل اور محنتی صحافی تھے ، ان کی سیاسی آراء سے کچھ احباب کو اختلاف کی گنجائش ہے لیکن ان کی کام کے ساتھ لگن سے انکار نہیں ۔  میرے پاس معلومات کی بنیاد پر بتا سکتا ہوں کہ ارشد شریف کی زندگی کو پاکستان میں کوئی خطرہ نہیں تھا۔

لیفٹیننٹ جنرل ندیم انجم کا کہنا تھا کہ ارشد شریف کے خاندان میں غازی بھی ہیں اور شہید بھی ، جب وہ یہاں تھے تو ان کا اسٹیبلشمنٹ سے رابطہ تھا ، جب وہ باہر گئے تو وہاں سے بھی ان کا رابطہ تھا بلکہ اس مہینے بھی انہوں نے رابطہ رکھا اور وہ واپس آنے کی خواہش کا اظہار بھی کررہے تھے۔

ڈی جی آئی ایس آئی نے کہا کہ کینیا میں اس کی انکوائری ہورہی ہے ، میں اپنے ہم منصب سے رابطے میں ہوں،  ان کی ابتدائی تحقیقات کے مطابق شناخت کی غلطی کے باعث حادثہ پیش آیا، اس پر ہم اور حکومت پاکستان مکمل مطمئن نہیں ، اسی لئے حکومت نے ایک ٹیم بنائی ہے جو تحقیقات کرنے کینیا جائے گی ۔

انہوں نے مزید کہا کہ اس پر حکومت نے جوڈیشل کمیشن بھی بنایا ہے ، میں نے جوڈیشل کمیشن سے دانستہ طور پر آئی ایس آئی کے ممبران کونکالا  تاکہ قوم کے سامنے غیر جانبدار اور شفاف  نتائج سامنے آئیں  ۔