پی ٹی آئی کا الیکشن کی تاریخ ملنے پر صوبائی اسمبلیاں تحلیل کرنے کا اعلان

 پاکستان تحریک انصاف نے ملک میں نئے الیکشن کی تاریخ ملنے پر صوبائی اسمبلیاں تحلیل کرنے کا اعلان کردیا، اسد عمر کہتے ہیں کہ الیکشن کال ہونے پر پنجاب اور پختونخوا میں اسمبلیاں تحلیل کردیں گے۔

تفصیلات کے مطابق اسلام آباد میں پریس کانفرنس کرتے ہوئے پی ٹی آئی کے مرکزی سیکریٹری جنرل نے کہا کہ پس پردہ کوئی مذاکرات نہیں ہورہے،

نئے الیکشن کی کال ہی سے ملک بحران سے نکلے گا کیوں کہ ملک جن حالات سے آج گزر رہاہے اس سے پہلے کبھی نہیں گزرا، اس لیے فوری انتخابات ملک کے لیے ناگزیر ہیں، انہوں نے کہا کہ عمران خان فوج کے خلاف نہیں،

نہ کبھی فوج کے خلاف بولے، ہم نہیں چاہتے ایسی حکومت ہو کہ ڈی جی آئی ایس آئی پریس کانفرنس کریں، یہ خود مان رہے ہیں کہ نئے الیکشن میں امپورٹڈ حکومت کا صفایا ہوجائے گا،

لانگ مارچ ڈی چوک نہیں جائے گا باقی کہیں بھی جاسکتے ہیں، عوام مکمل حقیقی آزادی کے لیے تیار ہیں، پوری قوم موبلائز ہوچکی ہے، لانگ مارچ میں بےتحاشا مخلوق آرہی ہے،

مارچ کا ٹارگٹ شفاف الیکشن ہے، قوم کو بیدار کرنے کا لانگ مارچ کا مشن مکمل ہوگیا، قوم کی بیداری نیا پاکستان ہے، پاکستان کے مستقبل کے فیصلے اب صرف عوام کریں گے، امریکہ، برطانیہ یا بند کمروں میں نہیں ہوں گے۔ 

اسد عمر نے کہا کہ ایک طرف کہہ رہے ہیں 200لوگ نکل رہے ہیں ،دوسری طرف عدالت سے رجوع کرلیا، اگر 200 لوگ نکل رہے ہوتے تو اسلام آبادکو کنٹینرز سے بند نہ کر دیا جاتا،

حکمرانوں کو نظر آرہا ہے کہ عوام ان کے ساتھ نہیں ہیں، عمران خان میں عوام کو موبلائز کرنے کی صلاحیت ہے، جتنی بھی طاقت استعمال کر لیں ذہنوں کو تبدیل نہیں کر سکتے،

جس دن عمران خان اسلام آباد پہنچے گا، اس دن عوام کا سمندر ہوگا، نوازشریف کو کہنا چاہتا ہوں کہ جی ٹی روڈ بدل چکی ہے، یہ وہ جی ٹی روڈ نہیں جو آپ چھوڑ کر گئے تھے، کوئی لندن امریکہ میں بیٹھ کر پاکستان کے فیصلے نہیں کر سکتا۔ 

انہوں نے کہا کہ حکمرانوں کو شرم آنی چاہیے اسی عوام سے ووٹ لیتے ہیں اسی کو جتھے کہتے ہیں، جو غلطی سے وزیر اعظم بن گئے ،

ان کو خود یقین نہیں کہ وہ اس عہدے پرہیں، ہمارے ملک میں جمہوری نظام صرف کاغذ پر ہے، ہم پہل نہیں کریں گے ،یہ حکومت بیرونی مداخلت سے آئی،

ملک جن حالات سے آج گزر رہاہے اس سے پہلے کبھی نہیں گزرا، فوری انتخابات ملک کے لیے ناگزیر ہیں۔ سابق وفاقی وزیر نے کہا کہ قومی سلامتی کمیٹی کےاجلاس میں مداخلت کی بات تسلیم ہوئی تھی،

افواج پاکستان کی ملک کے لیے قربانیاں ناقابل فراموش ہیں، ملکی ادارے اسلحہ سے مضبوط نہیں ہوتے مضبوط قوم پیچھے ہوتی ہے، ملک کو بحرانوں سے نکالنے کا واحد طریقہ الیکشن ہے۔