لانگ مارچ : عمران خان کے خطاب کے اختتام پر نیا سیکیورٹی پلان مرتب

تفصیلات کے مطابق اسلام آباد پولیس نے تحریک انصاف عمران خان کے خطاب کے اختتام پر نیا سیکیورٹی پلان ترتیب دے دیا۔

ذرائع کا کہنا ہے عمران خان کے خطاب کے اختتام پر اسلام آباد میں سیکیورٹی مزید الرٹ رہے گی، سیکیورٹی کی تین لیئرز بنائی جائیں گی اور فیض آباد تا زیرو پوائنٹ نفری تعینات ہوگی۔

ذرائع نے کہا ہے کہ نائنتھ ایونیو اور آئی جے پی روڈ پر بھی نفری تعینات کی جائے گی اور ریڈزون کے اندر رینجرز موجود رہے گی۔

پولیس کا کہنا ہے کہ جلسے کے اختتام پر کسی ریلی کو اسلام آباد داخلے کی اجازت نہ ہو گی۔

خیال رہے پاکستان تحریک انصاف آج راولپنڈی میں عوامی طاقت کا مظاہرہ کرنے جارہی ہے، پی ٹی آئی کی کال پر ملک بھر سے قافلے راولپنڈی پہنچ گئے ہیں۔

عمران خان ساڑھے3 بجے تک لانگ مارچ کی قیادت کریں گے اور لانگ مارچ کے شرکا سے خطاب کریں گے، جس میں آئندہ کے لائحہ عمل کا اعلان کیا جائے گا۔