جنیوا کانفرنس میں پاکستان کے لیے 9 ارب ڈالر سے زائد امداد کا اعلان کیا گیا،وزیراعظم

 وزیراعظم شہباز شریف کا کہنا ہے کہ سیلاب متاثرین کی بحالی کے لیے مسلسل کوشش کرتے رہیں گے۔مخالفین کے پراپیگنڈے پر کان دھرتے تو امداد کا سوال ہی پیدا نہ ہوتا،

بدقسمتی سے ملک میں تقسیم در تقسیم پیدا کر دی گئی ہے۔ وزیراعظم شہباز شریف نے وفاقی وزراء کے ہمراہ پریس کانفرنس کرتے ہوئے کہا کہ عوام کی دعاؤں کا نتیجہ ہے کہ جنیوا کانفرنس کامیاب ہوئی،

جینوا کانفرنس میں پاکستان کے لیے 9 اعشاریہ 7 ارب ڈالر امداد کا اعلان کیا گیا،امداد کے حوالے سے ہمیں طے کرنا ہو گا،کیسے ایک ایک پائی استعمال کرنی ہے۔ 

اسلامی ڈیولپمینٹ بینک کی جانب سے امداد پر حیرانی اور خوشی ہوئی،ورلڈ بینک نے سیلاب متاثرین کی بحالی کے لیے 2 ارب ڈالر کا اعلان کیا۔ 

سعودی عرب نے ایک ار ب ڈالر کا اعلان کیا،امریکہ نے 100ملین ڈا لر کا حصہ ڈالا۔قطر نے 25 ملین ڈالر کا اعلان کیا جبکہ جینوا میں اسلامی ڈیولپمینٹ بینک نے بڑی امداد کا اعلان کیا۔

وزیراعظم کا کہنا تھا کہ اٹلی،نیدرلینڈ،ناروے، فرانس،سویڈن اور برطانیہ بھی امداد دینے والے ممالک میں شامل ہیں۔

مخالفین نے ہمارے خلاف پراپیگنڈہ کیا لیکن رقوم کا اعلان قوم کی عزت،توقیر اور اعتماد کا اظہار ہے جو پاکستان پر کیا گیا۔وزیر خزانہ اسحاق ڈار نے عالمی مالیاتی اداروں کو قائل کرنے میں اہم کردار ادا کیا۔
میں نے جینوا میں کہا تھا کہ امدادی رقم کی ایک ایک پائی عوام کی خوشحالی اور ترقی پر نچھاور کی جائے گی۔ شہباز شریف نے کہا کہ سیلاب متاثرین کی بحالی کے لیے بہترین مسودہ تیار کیا گیا،

جنیوا میں دنیا کو وفاق نہیں تمام صوبوں کی یگانگت کا پیغام دیا گیا،کسی کو شک نہیں ہونا چاہیے کہ حکومت پر ہماری عوام اور دنیا نے اعتماد کیا۔ 

اب ہم نے اپنی کاوشیں اور توانائی بروئے کار لا کر کام کرنا ہے،جینوا کانفرنس میں تمام شریک ممالک کی جانب سے امداد پر مشکور ہوں۔ انہوں نے مزید کہا کہ ہمیں شفافیت کے ساتھ امداد کو استعمال کرنا ہو گا،ہماری ٹیم میں تجربہ کار،باہمت اور نوجوان لوگ موجود ہیں۔