عدالت نے عدم پیشی پر عمران خان کی حفاظتی درخواست ضمانت خارج کردی

لاہور: عمران خان کی حفاظتی ضمانت کے کیس میں لاہور ہائی کورٹ نے وکالت نامے اور حلف نامے میں دستخط میں فرق سامنے آنے پر عمران خان کو توہینِ عدالت کے نوٹس کا عندیہ دیتے ہوئے شام ساڑھے چھ بجے تک پیش ہونے کا حکم دے دیا۔

عدالتی حکم پر پی ٹی آئی کے چیئرمین عمران خان زمان پارک سے لاہور ہائی کورٹ میں پیشی کیلیے روانہ ہوئے تو سیکیورٹی سخت کردی گئی، قبل ازیں عمران خان کے بھانجے حسان نیازی نے پی ٹی آئی چیئرمین کے شام ساڑھے چھ بجے تک عدالت پیش ہونے کی یقین دہانی کرائی۔

اس سے قبل جسٹس علی باقر نجفی نے عمران خان کے وکلا کو ریمارکس دیے کہ آپ اپنی درخواست واپس لے لیں اور جب عمران خان ٹھیک ہوں تو دوسری درخواست دائر کریں۔

عمران خان نے لاہور ہائیکورٹ میں پیش ہونے کا فیصلہ قانونی ماہرین سے مشاورت کے بعد کیا، جس کے بعد پی ٹی آئی کے وکلا کی بڑی تعداد ہائیکورٹ پہنچ گئی۔

سابق وزیر اعلیٰ پنجاب پرویز الہیٰ نے کہا کہ  ڈاکٹرز کے مطابق عمران خان زخمی ہیں اور چل نہیں سکتے مگر ہم عدالتوں کا احترام کرتے ہیں، عمران خان گاڑی کے زریعے احاطہ عدالت تک چلے جائیں تو کوئی مضائقہ نہیں ہے، ہمیں یقین ہے عدالتوں سے انصاف ملے گا۔