چیف جسٹس کراچی بلدیاتی الیکشن میں دھاندلی اور ای سی پی کی کارکردگی پر نوٹس لیں: جماعت اسلامی

امیرجماعت اسلامی سراج الحق نے چیف جسٹس پاکستان سے کراچی میں ہونے والے بلدیاتی انتخابات میں بدترین دھاندلی اور الیکشن کمیشن کی کارکردگی پر ازخود نوٹس لینے کا مطالبہ کیا ہے۔

سراج الحق کی جانب سے چیف جسٹس پاکستان کو لکھے گئے خط میں کہا گیا ہے کہ بلدیاتی انتخابات سے قبل ہی حکومتی جماعت نے کہا کہ کراچی کا آئندہ میئرجیالا ہوگا، بلدیاتی انتخابات کے لیے بدنیتی کی بنیاد پر حلقہ بندیاں اور انتخابی فہرستیں تیار کی گئیں اور سیاسی وابستگی کی بنیاد پر انتخابی عملے کی تعیناتی کی گئی۔

امیر جماعت اسلامی نے خط میں لکھا کہ بلدیاتی انتخابات میں زیادہ ترانتخابی عملہ حکومتی جماعت کا حامی تھا، ریٹرننگ افسران نے ہزاروں ووٹوں سے جیتنے والوں کو ہراکر پیپلزپارٹی کے امیدواروں کی جیت کا اعلان کیا،  الیکشن کمیشن نے دھاندلی کے کیس دوبارہ ان آراو کو بھیج دیے جن پر دھاندلی کے الزامات ہیں۔

چیف جسٹس پاکستان کو لکھے گئے خط میں امیر جماعت اسلامی کا کہنا تھا 6 یونین کمیٹیاں جن میں بدترین دھاندلی ہوئی، ان یوسیز میں فارم 11کے نتائج کے برعکس ریٹرننگ افسرا ن (آر او) نے نتیجے جاری کیے، جماعت اسلامی نے 66 پولنگ اسٹیشنز کی نشاندہی کی  جہاں نتائج تبدیل کیے گئے، الیکشن کمیشن نے 22 مارچ کو17 پولنگ اسٹیشنز کو خود ہی منتخب کر کے ری کاؤنٹنگ کا حکم دے دیا۔

سراج الحق نے چیف جسٹس کو لکھا کہ سپریم کورٹ آئینی اختیارات کا استعمال کرتے ہوئے معاملے کا فوری نوٹس لے اور کراچی کے عوام کو ان کا حق دیا جائے۔