عالمی برادری فلسطین اور بھارت میں مسلمانوں کے خلاف بربریت کا نوٹس لے، شازیہ مری

اسلام آباد: وفاقی وزیر تخفیف غربت و سماجی تحفظ شازیہ مری نے کہا ہے کہ عالمی برادری فلسطین اور بھارت میں مسلمانوں کے خلاف بربریت کا نوٹس لے۔

بھارت کی 8 ریاستوں میں مسلمانوں کے خلاف ریاستی تشدد کیا جا رہا ہے، اسلامو فوبیا میں آئے روز اضافہ ہو رہا ہے جو قابل مذمت ہے۔

جمعرات کو قومی اسمبلی میں اظہار خیال کرتے ہوئے انہوں نے کہا کہ فلسطین میں مسجد اقصیٰ میں فلسطینی عبادت گزاروں پر بربریت کی مذمتی قرارداد منظور کی گئی ہے۔

اس سے قبل بھی ماضی میں رمضان المبارک میں اسی طرح کی بربریت فلسطینیوں کے روا رکھی گئی ہے جس کی ہم مذمت کرتے ہیں، اس کے ساتھ ساتھ بھارت میں مسلمانوں کے خلاف تشدد ہو رہا ہے، 8 ریاستوں میں مسلمانوں پر ظلم ڈھائے جا رہے ہیں۔

ان کے کاروبار تباہ کئے جا رہے ہیں، ان کیلئے زمین تنگ کی جا رہی ہے، وہاں اسلامو فوبیا بڑھ رہا ہے جس کی ہم سخت مذمت کرتے ہیں، ہم اس ایوان سے بھی کوشش کریں گے کہ بھارت تک اپنے جذبات پہنچائیں اور مودی ہوش کے ناخن لے اور اسلامو فوبیا کے خلاف اقدامات بند کئے جائیں اور مسلمانوں کو تحفظ دیا جائے۔