حکومت اور کالعدم تحریک کے درمیان معاہدے پر مکمل عملدرآمد ہو چکا : فواد چودھری

تفصیلات کے مطابق وفاقی وزیرا طلاعات فواد چودھری نے سماجی رابطے کی ویب سائٹ پر پیغام  میں  کہا کہ قراداد قومی اسمبلی میں پیش ہو چکی ہے اور  ایم پی او کے تحت گرفتار لوگ رہا کر دئیے گئے۔  اس ضمن میں ملک میں احتجاج کا سلسلہ ختم ہو چکا۔ فوادچودھری نے مزید کہا کہ مسلم لیگ نون  یا پیپلز پارٹی اگر  اپنی قراداد لانا چاہتے ہیں تو یہ ان کا حق ہے، حکومت کا اس سے کوئی لینا دینا نہیں ہے ۔

حکومت اور کالعدم تحریک کے درمیان معاھدے پر مکمل عملدرآمد ہو چکا ہے، قراداد پیش ہو چکی ہے، MPO میں گرفتار لوگ رہا کر دئیے گئے ہیں اس ضمن میں ملک میں احتجاج کا سلسلہ ختم ہو چکا، نون لیگ یا پیپلز پارٹی اپنی قراداد لانا چاہتے ہیں تو یہ ان کا حق ہے حکومت کا اس سے کوئ لینا دینا نہیں

— Ch Fawad Hussain (@fawadchaudhry) April 23, 2021

واضح رہے کہ  حکومت اور کالعدم تحریک لبیک کے درمیان ہونے والے مذاکرات   میں  فریقین میں4 نکات پر اتفاق  ہواتھا ، حکومت  فرانسیسی سفیر کی ملک بدری کی قرارداد آج  قومی اسمبلی میں پیش  کرے گی، اگر قومی اسمبلی نے منظوری دی تو فرانسیسی سفیر کو نکال دیا جائے گا،تمام فرانسیسی مصنوعات کا بائیکاٹ کیا جائے گا اور تمام کارکنان کی رہائی کا نوٹیفکیشن جاری کیا جائے گا۔

وزیر مذہبی امور اور وزیر داخلہ شیخ رشید پر مشتمل حکومتی ٹیم کے ٹی ایل پی رہنماؤں کے ساتھ مذاکرات میں گورنر پنجاب چوہدری سرور اور صوبائی وزیر قانون راجا بشارت نے حکومت کی نمائندگی کی تھی۔

یاد رہے کہ وفاقی وزیر داخلہ نے ایک اہم بیان جاری کرتے ہوئے  بتایا تھا کہ تحریک لبیک پاکستان (ٹی ایل پی) کے ساتھ مذاکرات شروع کر دیے گئے ہیں، جن پولیس اہل کاروں کو ترغمال بنایا گیا تھا انھیں چھوڑ دیا گیا ہے۔ پنجاب حکومت کی پہلی میٹنگ کامیاب ہوئی ہے، دوسرے راؤنڈ میں باقی معاملات بھی طے پا جائیں گے، اللہ سے امید ہے ٹی ایل پی سے معاملات خوش اسلوبی سے طے پا جائیں گے۔

واضح  رہے کہ وزارت داخلہ نے 15 اپریل کو تحریک لبیک پاکستان کو کالعدم قرار دیا تھا ۔